पेरिस सेन्ट जर्मेन (पीएसजी) ले लगातार पाँचौं पटक फ्रेन्च लिग वानको उपाधि जित्दै कुल १४औं पटकको उपाधि हात गरेको छ। गएराति सम्पन्न लिग खेलमा पीएसजीले लेन्सलाई २-० ले पराजित गर्दै यस सिजनको लिग उपाधि सुनिश्चित गरेको हो। लेन्सको मैदानमा भएको खेलमा कभिचा कभारात्खेलियाले २९औं मिनेटमा गोल गर्दै पारी अघि बढाएका थिए भने इब्राहिम एमबायेले दोस्रो हाफको इन्जुरी समयमा दोस्रो गोल गरेका थिए।
पीएसजीका म्यानेजर लुइस एनरिकेले यस उपाधिलाई सबैभन्दा मिठो र कठिन जित भएको बताएका छन्। उनले भने, “यो हाम्रो सबैभन्दा मिठो र सबैभन्दा कठिन उपाधि हो। नि:सन्देह, पछिल्ला तीन वर्षमध्ये यो जित्न सबैभन्दा गाह्रो रहेछ।” एनरिकेले लेन्सको उत्कृष्ट प्रदर्शनलाई पनि यस सफलताका कारणहरू मध्ये एकको रूपमा उद्धृत गरेका छन्।
पीएसजीले फ्रेन्च लिग वानमा सबैभन्दा धेरै १४ पटक उपाधि जीतेको छ भने सेन्ट एटिएनले १० पटक यो उपाधि जितेको छ। पछिल्ला १४ सिजनमा पीएसजी १२ पटक च्याम्पियन बन्न सफल भएको छ। सन् २०१२-१३ सिजनमा आफ्नो तेस्रो लिग उपाधि हात पारेको पीएसजीले त्यसयता सन् २०१६-१७ र २०२०-२१ सिजनमा मात्र लिगमा उपाधि जित्न सकेको थिएन।
अब पीएसजीले आइतबार लिगको अन्तिम खेलमा आफ्ना शहरका प्रतिद्वन्द्वी पेरिस एफसीसँग प्रतिस्पर्धा गर्नेछ। साथै, पीएसजीले मे ३० मा युइएफए च्याम्पियन्स लिगको फाइनलमा इंग्लिस क्लब आर्सनलसँग खेल्नेछ। यस खेलमा पीएसजी उपाधि रक्षा गर्ने प्रयासमा हुनेछ भने २० वर्षपछि च्याम्पियन्स लिगको फाइनलमा पुगेको आर्सनल पहिलो पटक च्याम्पियन बन्ने लक्ष्यमा छ।
