दक्षिण कोरियाको इन्चोनमा मे १६ देखि २६ सम्म सञ्चालन हुने याङ यङ जा टेबलटेनिस अन्तर्राष्ट्रिय प्रशिक्षण शिविरमा सहभागी हुन ६ सदस्यीय नेपाली टोली कोरिया प्रस्थान गरेको छ। प्रशिक्षणपछि मे २७ मा हुने अन्तर्राष्ट्रिय क्रिस्चियन टेबलटेनिस प्रतियोगितामा नेपाली टोलीले सहभागिता जनाउने छ। प्रशिक्षण शिविरमा नेपालसहित फिलिपिन्स, लाओस र मंगोलियाका २५ खेलाडी सहभागी हुनेछन् र शिविरको नेतृत्व ओलम्पिक स्वर्ण विजेता याङ यङ जा गर्नेछिन्।
दक्षिण कोरियाको इन्चोनमा मे १६ देखि २६ तारिखसम्म सञ्चालन हुने याङ यङ जा टेबलटेनिस मिसन (वाइटीटीए) अन्तर्राष्ट्रिय प्रशिक्षण शिविरमा सहभागी हुन ६ सदस्यीय नेपाली टोली शनिबार दक्षिण कोरियाको इन्चोन प्रस्थान गरेको छ। प्रशिक्षणपछि यिनै खेलाडीहरूले मे २७ मा हुने अन्तर्राष्ट्रिय क्रिस्चियन टेबलटेनिस प्रतियोगितामा भाग लिने छन्। प्रशिक्षण शिविर र प्रतियोगितामा सहभागी खेलाडीहरूमा यु–१३ मा रिभानमुनि बज्राचार्य र प्राज्ञा महर्जन, यु–१६ मा रिजन शाक्य र सुरम्या शाक्य तथा यु–१९ मा हिमाल बिष्ट र योङ्गी पौडेल रहेका छन्। टोली व्यवस्थापक हान्न को रहेका छन् र अखिल नेपाल टेबलटेनिस संघका कोषाध्यक्ष ज्याकी महर्जनले जानकारी दिएका छन्।
यस प्रशिक्षण शिविरका लागि खेलाडी छनोट गत अक्टोबर ५, २०२५ मा ललितपुरको भैंसेपाटीस्थित नेपाल एपीएम क्लबमा भएको थियो। प्रतियोगितामा यु–१३, यु–१६ र यु–१९ उमेर समूहका छात्र-छात्रा गरी ६ विधामा प्रतिस्पर्धा भएको थियो। प्रत्येक विधाका विजेताहरूलाई दक्षिण कोरियाको प्रशिक्षण शिविरका लागि छनोट गरिएको कोषाध्यक्ष महर्जनले बताए। प्रशिक्षण शिविरमा नेपालसहित फिलिपिन्स, लाओस र मंगोलियाका गरी २५ खेलाडीहरूको सहभागिता रहनेछ। शिविरको नेतृत्व सन् १९८८ की ओलम्पिक स्वर्ण विजेता दक्षिण कोरियाकी चर्चित टेबलटेनिस खेलाडी याङ यङ जा गर्नेछिन्। सहभागी खेलाडीहरूले उनी र उनका प्रशिक्षक टोलीसँग प्रत्यक्ष प्रशिक्षण पाउने अवसर पाउनेछन्। याङ यङ जा विगत ७ वर्षदेखि नेपाली टेबलटेनिसको विकासमा सक्रिय रूपमा सहयोग गर्दै आएकी छन्। उनले नेपालमा तीन पटक टेबलटेनिस क्लिनिक सञ्चालन गरिसकेकी छन् र नेपाली युवा खेलाडीहरूलाई अन्तर्राष्ट्रिय स्तरमा विकास गर्न निरन्तर योगदान दिइरहेकी छन्। टोलीलाई कोषाध्यक्ष महर्जनले त्रिभुवन अन्तर्राष्ट्रिय विमानस्थलमा शनिबार बिदाई गरेका छन्।
सम्बन्धित खबर
