चितवनको इच्छाकामना गाउँपालिका–१ कुलबाङमा जङ्गली च्याउ खानाले दुई जनाको मृत्यु भएको छ। मृत्यु हुनेमा ९ वर्षीया नमुना चेपाङ र ११ वर्षका सञ्जय चेपाङ रहेका छन्। १३ वर्षीया मनिता चेपाङको अवस्था गम्भीर छ र उनी भरतपुर अस्पतालमा उपचाररत छिन्। ३ जेठ, चितवन।
चितवनमा जङ्गली च्याउ खानाले मृत्यु हुनेको संख्या दुई पुगेको छ। इच्छाकामना गाउँपालिका–१ कुलबाङका दुई जनाको मृत्यु भएको हो। मृत्यु हुनेमध्ये ९ वर्षीया नमुना चेपाङ र ११ वर्षका सञ्जय चेपाङ रहेका छन्। जिल्ला प्रहरी कार्यालयका प्रहरी नायब उपरीक्षक रवीन्द्र खनालका अनुसार नमुनाको जेठ १ गते मृत्यु भएको हो भने सञ्जयको शनिबार राति उपचारको क्रममा मृत्यु भएको हो।
२९ वैशाखमा श्यामबहादुर चेपाङको पाँच सदस्यीय परिवारले जङ्गली च्याउ खाएका थिए। जसमा तीन जना १ जेठमा बिरामी भएर उपचारको लागि भरतपुर अस्पताल लगिएको थियो। उपचारको क्रममा नमुनाको मृत्यु भएको थियो। १३ वर्षीया मनिता चेपाङ हाल भरतपुर अस्पतालमा उपचाररत छिन्। बिरामी मनिताको अवस्था गम्भीर रहेको प्रहरीले जानकारी दिएको छ।
