राष्ट्रिय स्वतन्त्र पार्टी (रास्वपा) खोटाङको प्रथम जिल्ला अधिवेशनबाट मुकुन्दकृष्ण थापा जिल्ला सभापतिमा निर्वाचित भएका छन्। २४ जेठमा दिक्तेलमा सम्पन्न अधिवेशनमा थापाले ७८ मत प्राप्त गरेका छन् भने उनका निकटतम प्रतिस्पर्धी ओजोनबाबु आचार्यले २८ मत प्राप्त गरेका छन्। उपसभापतिमा गोविन्द भुजेल र कोषाध्यक्षमा तारा दाहाल निर्विरोध चयन भएका छन् भने सचिवमा पर्शुराम थापा निर्वाचित भएका छन्।
थापाले २०८१ पुस १३ गतेको प्रथम जिल्ला भेलाबाट सभापति बनेका थिए र यस पटक पुनः जिल्लाका अध्यक्षको जिम्मेवारी पाएका हुन्। दिक्तेल रुपाकोट मझुवागढी नगरपालिका–५ लफ्याङ निवासी थापा सिभिल इन्जिनियर हुन्। सचिवमा पर्शुराम थापाले ७१ मत पाए भने अर्का उम्मेदवार उद्धवप्रसाद आचार्यले २८ मत प्राप्त गरेका छन्। सह–सचिवमा ६४ मतसहित राजन अधिकारी निर्वाचित भएका छन्।
सह–सचिवका उम्मेदवार दुर्वासा गेलालले २८ र भक्तबहादुर गिरीले ९ मत प्राप्त गरेका छन्। सदस्यमा चन्द्रबहादुर परियार, प्रकाश अधिकारी, कृष्णबहादुर केसी, थानेश्वर रिजाल, नविन आचार्य, केशरबहादुर श्रेष्ठ र मेघराज दंगाल चयन भएका छन्। निर्वाचन क्षेत्र उप–संयोजकमा लवबहादुर गुरुङ, निर्वाचन क्षेत्र सचिवमा तुलाबहादुर खत्री र निर्वाचन क्षेत्र सदस्यमा भिमन गुरुङ चयन भएका छन्।
सम्बन्धित खबर
