सरकारले चालु आर्थिक वर्ष २०८२/८३ मा स्टार्टअप कर्जाका लागि देशभरिबाट ९६६ नयाँ प्रस्ताव छानिएको छ। औद्योगिक व्यवसाय विकास प्रतिष्ठानले छनोट भएका उद्यमीहरूलाई तीन दिनभित्र तोकिएको बैंक शाखामा आवश्यक कागजातसहित सम्पर्क गर्न सूचित गरेको छ। सरकारले तीन प्रतिशत ब्याजदरमा कर्जा उपलब्ध गराउन ७३ करोड रुपैयाँ बजेट विनियोजन गरेको छ।
१७ असार, काठमाडौं। सरकारले चालु आर्थिक वर्ष २०८२/८३ मा स्टार्टअप कर्जाका लागि देशभरिबाट ९६६ प्रस्तावक छानेको छ। औद्योगिक व्यवसाय विकास प्रतिष्ठानले मंगलबार कर्जा प्रवाह गर्ने सिफारिस भएका प्रस्तावकहरूको नाम सार्वजनिक गर्दै, ती प्रस्तावकहरूलाई तीन दिन भित्र तोकिएको बैंक शाखामा सम्पर्क गर्न सूचित गरेको छ।
प्रतिष्ठानका अनुसार, कार्यक्रम वार्षिक सालसालि भएकाले असार मासको अन्त्यपछि परियोजना प्रस्ताव र सिफारिश रकम स्वतः निष्क्रिय हुने भएकाले कर्जा प्राप्तिका लागि आह्वान गरिएको हो। छानिएका प्रस्तावकहरूले तोकिएको बैंक शाखा कार्यालयबाट कर्जा प्राप्त गर्न आवश्यक कागजातसहित सम्पर्क गर्नुपर्ने सूचनामा उल्लेख छ।
आवश्यक कागजातहरूमा व्यवसाय दर्ता र नवीकरणको सक्कल प्रमाणपत्र, प्यान/भ्याट दर्ताको प्रमाणपत्र, उद्यमीको नागरिकताको सक्कल प्रमाणपत्र, आर्थिक वर्ष २०८१/८२ को करचुक्तिको प्रमाणपत्र र आधिकारिक व्यक्तिको पासपोर्ट साइज फोटो समावेश छन्। यसअघि सहुलियतपूर्ण कर्जा लिएका र कर्जा चुक्ता नगरेकाहरूलाई पुनः कर्जा नदिने पनि सूचनामा उल्लेख गरिएको छ।
