सरकारले जापानी सहयोग नियोगको प्राविधिक सहयोगमा काठमाडौं उपत्यका शहरी यातायात प्रणालीको नयाँ मास्टरप्लान सार्वजनिक गरेको छ। यस योजनामा रत्नपार्क–भक्तपुर मेट्रोरेल, चक्रपथमा बस र्यापिड ट्रान्जिट, र विभिन्न स्थानमा सुरुङ मार्ग निर्माण लगायत १५ प्रमुख पूर्वाधार परियोजनाहरू समावेश छन्। सन् २०५० सम्मको जनसंख्या वृद्धिको कारण उत्पन्न हुने यातायात चाप व्यवस्थापन गर्न यो योजना तयार पार्दै कार्यान्वयनमा २ खर्ब रुपैयाँभन्दा बढी खर्च लाग्ने अनुमान गरिएको छ। २१ साउन, काठमाडौं।
सरकारले जापानी सहयोग नियोग (जाइका) को प्राविधिक सहयोगमा काठमाडौं उपत्यका शहरी यातायात प्रणालीको नयाँ मास्टरप्लान तयार पारेको छ। यसअघि तीन पटक यस्तै मास्टरप्लान बनाइए पनि कार्यान्वयन नभएकाले यस पटक चौथो मास्टरप्लान प्रस्तुत गरिएको छ। बिहीबार पूर्वाधार विकास मन्त्रालय र जाइकाले संयुक्त रूपमा यस मास्टरप्लानको अवधारणा सार्वजनिक गरेका छन्। योजना कार्यान्वयनमा २ खर्ब रुपैयाँभन्दा बढी खर्च हुने अनुमान गरिएको छ।
यस मास्टरप्लानले काठमाडौं उपत्यकामा तीन प्रमुख रुटहरू अर्थात् चक्रपथ, उत्तर–दक्षिण र पूर्व–पश्चिम छुट्याएको छ। पूर्व–पश्चिम रुट अन्तर्गत रत्नपार्कदेखि भक्तपुरसम्मको मेट्रोरेललाई प्राथमिकतामा राखिएको छ। यसलाई बस र्यापिड ट्रान्जिटसँग एकीकृत गरि सुलभ र सुरक्षित सार्वजनिक यातायात विकास गर्ने लक्ष्य राखिएको छ। त्यस्तै, चाबहिल–गौशालामा १५६२ मिटर लामो दुईतले सुरुङ मार्ग निर्माण गरिनेछ। उक्त क्षेत्रमा विश्व सम्पदा सूचीकृत संरचना भएका कारण सुरुङ मार्ग अवधारणाको प्रस्ताव गरिएको हो।
मास्टरप्लानमा चक्रपथमा बस र्यापिड ट्रान्जिट संचालन गर्ने प्रस्ताव गरिएको छ, जहाँ उच्च यात्रु क्षमता भएका बसहरूलाई विशेष लेन दिइनेछ। तर चाबहिल–गौशालाको खण्डमा यस्तो लेन सिर्जना गर्नु व्यवहारिक नहुने देखिएको छ। मास्टरप्लानले काठमाडौंमा यातायातका मुख्य समस्या साँघुरा सडकहरू, ट्राफिक जाम (बोटलनेक), अपर्याप्त पुल तथा सडक, पार्किङ अभाव, चोकमा वैज्ञानिक ट्राफिक लाइट प्रणालीको कमी, दुर्घटना वृद्धि, चालक अनुशासनको कमी र नियमन कमजोर रहेको पत्ता लगाएको छ।
