समाचार सारांश गुल्मीमा उद्योग तथा व्यवसाय दर्ता गर्नुभन्दा बन्द गर्नेहरूको संख्या पछिल्ला पाँच आर्थिक वर्षयता निरन्तर बढ्दै आएको छ। गत आर्थिक वर्ष २०८२/०८३ मा जिल्लामा कुल २८४ वटा उद्योग–व्यवसाय बन्द हुँदा केवल ५७ वटा मात्र नयाँ दर्ता भएका छन्। घरेलु तथा साना उद्योग कार्यालयका प्रमुख राजीव अर्यालका अनुसार स्थानीय तहबाटै दर्ताको व्यवस्था र ऋण चुक्ता भएपछि फर्म बन्द गर्ने प्रवृत्तिले यस्तो अवस्था आएको हो। २२ साउन, गुल्मी।
गुल्मी जिल्लामा उद्योग र व्यवसाय दर्ता गर्नुभन्दा बन्द हुनेहरूको संख्या बढेको छ। घरेलु तथा साना उद्योग कार्यालय गुल्मीका पछिल्लो पाँच आर्थिक वर्षहरूको तथ्यांकले यहाँका साना उद्योग र वाणिज्यिक फर्महरू सञ्चालनभन्दा बन्द हुने क्रम बढ्दो देखाएको छ। गत आर्थिक वर्ष २०८२/०८३ मा उद्योग क्षेत्रबाट १३९ र वाणिज्यबाट १४५ गरी जम्मा २८४ उद्योग–व्यवसाय बन्द भएका छन् भने सोही अवधिमा ५७ मात्र नयाँ उद्योग–व्यवसाय दर्ता भएका थिए। सो अवधिमा ८९९ उद्योग–व्यवसाय नवीकरण भएका छन्। कार्यालयले १३ लाख ९ हजार १७५ रुपैयाँ कर संकलन गरेको उद्यम विकास सहजकर्ता त्रिविक्रम ज्ञवालीले जानकारी दिएका छन्।
अघिल्लो आर्थिक वर्ष २०८१/०८२ मा उद्योग क्षेत्रबाट २६३ र वाणिज्य क्षेत्रबाट ३२० गरी ५८३ उद्योग–व्यवसाय बन्द भएका थिए भने सोही वर्ष ११० वटा नयाँ उद्योग–व्यवसाय दर्ता भएका थिए (उद्योग ५८ र वाणिज्य ५२)। त्यस वर्ष १ हजार १४० उद्योग–व्यवसाय नवीकरण भएका थिए र राजस्व संकलन ४७ लाख ७४ हजार २३५ रुपैयाँ पुगेको थियो। आर्थिक वर्ष २०८०/०८१ मा उत्पादनमूलक ९, कृषि तथा वनजन्य ५०, पर्यटन क्षेत्रका ६५ र सेवा क्षेत्रका ३८ गरी कुल १५९ उद्योग बन्द भएका थिए। वाणिज्यतर्फ १८७ निजी फर्म बन्द भएका थिए।
उक्त वर्ष उद्योगमा ७३ र वाणिज्यमा ६३ गरी १३६ नयाँ उद्योग–व्यवसाय दर्ता भएका थिए। त्यही अवधिमा उद्योगबाट २९५ र वाणिज्यबाट ४२९ उद्योग–व्यवसाय नवीकरण भएका थिए। राजस्व संकलन २४ लाख ७६ हजार ५ रुपैयाँ भएको थियो। घरेलु तथा साना उद्योग कार्यालय गुल्मीका प्रमुख राजीव अर्यालका अनुसार पाँच लाख रुपैयाँसम्मको पूँजी भएका व्यवसाय स्थानीय तहबाटै दर्ता गर्ने व्यवस्था लागू भएपछि कार्यालयमा नयाँ दर्ता हुने संख्या घटेको हो। उनले भने, कतिपयले ऋण लिनका लागि मात्र व्यवसाय दर्ता गर्ने र ऋण चुक्ता भएपछि फर्म बन्द गर्ने प्रवृत्ति छ। व्यवसायबाट अपेक्षित फल नआउनु, युवापुस्ता उद्यमप्रति आकर्षित नहुनु र वृद्ध अभिभावकले व्यवसाय निरन्तर सञ्चालन गर्न नसक्दा पनि फर्म बन्द हुने क्रम बढेको छ। उनले पछिल्ला वर्षहरूमा सञ्चालनमा रहेका उद्योग–व्यवसायसमेत बन्द हुने क्रम बढ्दै गएको बताएका छन्।
