इलामका धर्म गौतमले पञ्चायती व्यवस्थाविरुद्ध बीपी कोइरालाले आह्वान गरेको सशस्त्र संघर्षको कथा समेटिएको पुस्तक ‘बीपी र विद्रोहका ती दिन’ सार्वजनिक गरेका छन्। किताब पब्लिसर्सकी सिइओ कल्पना ढकालका अनुसार, पुस्तकमा गौतमले आफ्ना व्यक्तिगत र राजनीतिक संस्मरणहरूलाई मुख्य रूपमा समावेश गरेका छन्। २०२९ सालमा भारत निर्वासनमा गएका गौतम सशस्त्र संघर्षका क्रममा हातहतियारसहित पक्राउ परेका थिए भने स्वदेश फर्कने क्रममा पनि चार वर्ष बन्दी जीवन बिताएका थिए।
२२ साउन, काठमाडौं। पञ्चायती व्यवस्थाविरूद्ध बीपी कोइरालाले आह्वान गरेको सशस्त्र संघर्षको कथा समेटेर इलामका धर्म गौतमले ‘बीपी र विद्रोहका ती दिन’ नामक पुस्तक ल्याएका छन्। बीपीले मेलमिलापको नीति अवलम्बन गर्दै २०३३ सालमा स्वदेश फर्कनुअघि, सुरुमा आफ्ना तीन जना विश्वासपात्रलाई नेपाल पठाएका थिए। तीमध्ये एक हुन्—इलामका धर्म गौतम। उनले आफ्ना व्यक्तिगत र राजनीतिक संस्मरणहरूलाई पुस्तकमा समेटेको जानकारी प्रकाशक किताब पब्लिसर्सकी सिइओ कल्पना ढकालले दिइन्।
गौतम २०२९ सालमा भारत निर्वासनमा गएदेखि नै बीपी कोइरालाको नजिक थिए। बीपीले पञ्चायती व्यवस्थाको अन्त्यका लागि आह्वान गरेको सशस्त्र संघर्षमा उनी पनि सहभागी थिए। त्यही क्रममा भारतको पूर्णियामा हातहतियारसहित पक्राउ परे। बीपीकै निर्देशनमा २०३३ कात्तिकमा स्वदेश फर्कने क्रममा फेरि पक्राउ परे र करिब चार वर्ष बन्दी जीवन बिताए। गौतमले इलामबाट सुरु भएको आफ्नो राजनीतिक यात्रा कसरि भारतको नक्सलबारी, बनारस, बिहार हुँदै काठमाडौंसम्म पुगेको थियो भन्ने घटनाक्रम उजागर गरेका छन्।
