पोर्चुगलका सुपरस्टार क्रिस्टियानो रोनाल्डोले आफ्नो फुटबल करियरको अन्तिम चरणमा पुगेको संकेत दिएका छन् र उत्कृष्ट विरासत छाड्ने आकांक्षा व्यक्त गरेका छन्। उनले सम्भवतः यो सिजन आफ्नो फुटबल यात्रा समाप्त हुने सम्भावना रहेको र मैदानमा प्रशंसनीय विरासत छोड्ने सपना देखिरहेको बताएका छन्। रोनाल्डोले फुटबलपछि जीवनमा परिवारसँग समय बिताउने, यात्रा गर्ने र प्याडेल खेल्नेसम्बन्धी योजना बनाएका छन्।
रोनाल्डोले भोग म्यागजिनसँगको कुराकानीमा भने, ‘सायद यो मेरो फुटबल करियरको अन्तिम वर्ष हो र म शानदार विरासत छोड्न चाहन्छु। मेरो भविष्यको योजनाहरु तयार छन्। मलाई व्यस्त राख्ने धेरै विकल्पहरू छन्। फुटबलबाट ठूलो खालीपन आउन सक्छ, त्यसैले त्यसलाई केवल एउटामात्र कुराले होइन, विभिन्न गतिविधिहरूबाट भरिनुपर्छ।’
हाल ४१ वर्षका रोनाल्डो साउदी अरबमा पेशेवर फुटबल खेलिरहेका छन् र नयाँ सिजन आउँदो अगस्ट १५ बाट सुरु गरिने तयारी गर्दैछन्। उनले परिवारसँग बढी समय बिताउने रुचि देखाएका छन्। रोनाल्डो र उनकी साथी जर्जिना रोड्रिग्वेजले अगस्ट ११ मा विवाह गरेका थिए। विवाह समारोह पारिवारिक र सानोतिनो वातावरणमा सम्पन्न भयो।
रोनाल्डोले करियरपछि परिवारसँग बढी समय बिताउने योजना बनाए पनि फुटबलबाट पूर्णरूपमा टाढा हुने योजना सम्बन्धमा विस्तृत जानकारी दिएका छैनन्। उनले भविष्यमा अझै सन्तान जन्माउने सम्भावनालाई अस्वीकृत पनि गरेका छैनन्। जर्जिनाले अहिले घरमा धेरै व्यस्तताका बाबजुद आगामी दिनहरूमा यो विषयमा सोच्न सकिने बताए।
