रुस र उत्तर कोरियालाई सडक मार्गद्वारा जोड्ने पहिलो पुल सञ्चालनमा

रुस र उत्तर कोरियालाई सडकमार्गबाट जोड्ने गरी बनाइएको पहिलो पुल हाल सञ्चालनमा आएको छ। यस पुलको कारण टूमन नदी पार गर्न र मालसामान ओसारपसार गर्न अत्यधिक सहज हुनेछ। उत्तर कोरियाली सरकारी सञ्चारमाध्यमले यस पुललाई “जनशक्ति आदानप्रदान, पर्यटन र व्यापार” का लागि प्रयोग गरिने बताए। तर युक्रेनी ओपन सोर्स इन्टेलिजन्स समूह ‘ट्रूथ हाउन्ड्स’ का अनुसार, यो पुल युक्रेन युद्धमा रुसलाई मद्दत गर्ने “प्रमुख रूपमा सैन्य ढुवानीका लागि गुप्त मार्ग” निर्माण गर्ने उद्देश्यले बनेको हो।

युक्रेन युद्ध सुरु भएपछि रुस र उत्तर कोरियाबीचका सम्बन्ध गहिरिँदै गएका बेला यो पुल निर्माण गरिएको हो। यसअघि रुसका राष्ट्रपति भ्लादिमिर पुटिन र उत्तर कोरियाका सर्वोच्च नेता किम जङ अनले एकअर्कालाई कुनै पनि आक्रमणको अवस्थामा सहयोग गर्ने प्रतिबद्धता व्यक्त गरेका थिए। रुसका प्रधानमन्त्री मिखाइल मिशुस्तिनले नयाँ पुललाई “मित्रताको नयाँ प्रतीक” भनेका छन् भने उत्तर कोरियाका प्रधानमन्त्री पाक टे-सङले पुल निर्माण र सञ्चालनलाई “ऐतिहासिक घटना”को रूपमा व्याख्या गरेका छन्।

अहिले मालसामान ढुवानीका लागि प्रयोगमा, रूसी सरकारी समाचार संस्था टासका अनुसार, दैनिक ३०० वटा सवारीसाधन र करीब २,३०० मानिसले यो पुल पार गर्न सक्नेछन्। गत मे महिनामा जारी गरिएको स्याटेलाइट तस्बिरहरूले झन्डै एक किलोमिटर लामो यस पुलसँगै नयाँ पहुँचमार्गहरू, एउटा सीमा जाँच चौकी, अन्य संरचनाहरू र पार्किङ स्थलहरू देखाएका थिए। रुस सरकारले सुरुमा यो पुल मालसामान ढुवानीका लागि मात्र प्रयोग गरिने र यस वर्षपछि यात्रु आवागमनका लागि पनि खोलिने जनाएको छ।

पुलको उद्घाटन समारोहमा भिडियोमार्फत सहभागी भएका मिशुस्तिनले मस्को र प्योङयाङबीचको सम्बन्ध “अभूतपूर्व उच्च स्तरमा” पुगेको बताएका छन्। उनले पुलले “व्यापार, आर्थिक, वैज्ञानिक, प्राविधिक र सांस्कृतिक सहकार्यमा थप विकासका लागि ठुलो गति प्रदान गर्ने” आशा व्यक्त गरे। पुल सञ्चालन हुँदा तत्कालै रुसतर्फ हतियार निर्यात बढ्ने सम्भावना छ। दक्षिण कोरियाका गुप्तचर निकायका अनुसन्धानकर्ताहरूका अनुसार, उत्तर कोरियाले पानीजहाजमार्फत ७ अर्बदेखि १४ अर्ब अमेरिकी डलर मूल्यका रकेट, क्षेप्यास्त्र र तोपका गोलाबारुदहरू रुसतर्फ पठाइसकेको छ।