प्रधानमन्त्री वालेन्द्र शाह बालेनले बाढीपछि केही दिनदेखि सामाजिक सञ्जालमा गरेका पोस्टहरूमध्ये शनिबार एक पोस्टमा लेखेका छन्, “यो अत्यन्त संवेदनशील समयमा पीडामा रहेका मानिसहरू माथि अनावश्यक टिप्पणी गर्ने, सताउने, थप पीडा दिनेहरू अपराधी हुन्। ती अपराधीहरूविरुद्ध सरकारले कडा कदम चाल्ने छ।” भदौ १० गते हिमचट्टान फुटेर भोटेकोशी र त्रिशूली नदीमा आएको भीषण बाढीमा हराएका व्यक्तिहरूका परिवारलाई लक्षित गर्दै यो पोस्ट गरिएको हो। सरकारले खोजी, उद्धार र राहत प्रदान गर्दा परिवारहरूले दिएको गुनासोमाथि सामाजिक सञ्जालमा नकारात्मक टिप्पणी हुने गरेको पाइन्छ।
अहिले सामाजिक सञ्जालमा फैलिएका थुप्रै भिडियो र कमेन्टहरूमा बाढी पीडितहरूमाथि अनावश्यक र अश्लील टिप्पणी गरिएको भन्दै नेपाल प्रहरीको साइबर ब्यूरोले अनुसन्धान गरिरहेको जानकारी दिएको छ। केही दिनअघि एक बाढीपीडित महिलाले सरकारसँगको कुराकानीमा भनिन्, “सरकारले छिटो उद्धारका लागि विशेषज्ञ र उपकरणहरू परिचालन गर्न सकेको भए हाम्रो परिवारको सदस्यको अवस्था छिट्टै थाहा हुन्थ्यो र बाँचिरहेकै अवस्थामा भेट्न सकिन्थ्यो।” तर केहीबेरपछि उनले आफैं फोन गरेर भनिन्, “मैले सरकारसँग गरेको गुनासो नदेखाउनुहोस् है। फेरि सामाजिक सञ्जालमा धेरै गाली आउँछ। मैले पहिले लेखेको पोस्टमा धेरै नराम्रा कमेन्टहरू आयो। हामीलाई भने पीडामाथि थप पीडा थपिएको छ।”
सामाजिक सञ्जालमा अहिले भाइरल भएको एउटा भिडियोमा एक महिलाले बाढीमा हराएका श्रीमानसहितका परिवारका सदस्यलाई खोज्न सरकारले तत्परता देखाएको छैन भन्दै गुनासो व्यक्त गरेकी छन्। उनले भनिन्, “बच्चा गएर अंगारो दिने भनिरहेको छ। मैले धेरैलाई गुहार गरिसकेँ, मलाई पठाइदेउ भनेर। म कहाँ जानुपर्ने हो? हामीलाई हाम्रो देशमा के छ? यो सरकार हो? यस्तो नाबालकलाई लिएर ‘हजुर, हजुर’ भनियोस् त कसैले केही सुनैंन्।”
प्रधानमन्त्री बालेनले पीडितहरूलाई थप पीडा दिनेहरूविरुद्ध सरकारले कडा हुँदा आफू निर्मम हुने बताएका छन्। सामाजिक सञ्जालको दुरुपयोग गरेर अरूको चरित्र हान्ने वा गालीगलौज गर्नेहरूले विद्युतीय कारोबार ऐन २०६३ को दफा ४७ अनुसार कारबाही भोग्नुपर्ने बताइएको छ। साइबर ब्यूरोका प्रवक्ता दिलीपकुमार गिरीले १० जनाको टोली गठन गरी अनुसन्धान गरिरहेको जानकारी दिए। “उजुरी नपरे पनि हामी आफैंले अनुसन्धान गरिरहेका छौँ,” उनले भने।
सम्बन्धित खबर
