भारतीय महिलाको पेटबाट १३ वटा पेन, ५ वटा चम्चा र एक मैनबत्ती निकालियो

भारतमा एक महिलाको पेटमा १३ वटा डटपेन, पाँचवटा काठका चम्चा र एउटा मैनबत्ती भएको पत्ता लागेपछि शल्यक्रिया गरी ती वस्तुहरू बाहिर निकालिएको चिकित्सकहरूले जानकारी दिएका छन्। पेटबाट निकालिएका वस्तुमध्ये एक डटपेन २५ सेन्टिमिटर लामो थियो। सामान्यतया कुनै अखाद्य पदार्थ निगल्दा पेटमा धेरै दुखाइ, बान्ता वा पखाला हुन्छ। तर जब कडा वस्तुहरू पेटमा हुन्छन्, ती महिलालाई कस्तो समस्या आयो? र ती वस्तुहरू कसरी निकालियो? शल्यक्रिया गर्ने डाक्टरले जानकारी प्रदान गरेका छन्।

चिकित्सकका अनुसार ती महिला आन्ध्र प्रदेशको पालनाडु जिल्लाकी ३३ वर्षीया विवाहिता हुन्। छातीको देब्रेपट्टि धेरै दुखाइ भएपछि परिवारले उनलाई एक निजी अस्पतालमा लगे र भर्ना गरियो। चिकित्सकहरूले तुरुन्तै उनको ECG र एन्डोस्कोपी गरे। माताश्री प्राइभेट अस्पतालकी डा. रामचन्द्र रेड्डीले भने अनुसार ECG सामान्य देखिएको थियो तर एन्डोस्कोपी गर्दा पेटमा डटपेन, चम्चा र मैनबत्ती जस्ता कडा वस्तुहरु भेटिएको थियो।

डा. रेड्डीका अनुसार तुरुन्तै CT स्क्यान गरेर पुष्टि गरेपछि एन्डोस्कोपी र ल्यापरोस्कोपी विधिबाट शल्यक्रिया गरी ती सबै वस्तुहरू निकालियो। चिकित्सकहरूले उल्लेख गरे कि बालबालिकाले प्रयोग गर्ने २५ सेन्टिमिटर लामो पेनले ती महिलाको पेटमा प्वाल पारेको थियो र यसले ‘न्यूमोमेडिआस्टिनम’ नामक अवस्था निम्त्याएको थियो। डा. रेड्डीले अहिले ती महिलाको अवस्था स्थिर रहेको बताए। ती महिलाले एक वर्षअघि पनि चारवटा पेन निगलेकी थिइन् र त्यतिबेला पनि शल्यक्रिया गरेर ती वस्तुहरू निकालीएको थियो।

मानसिक स्वास्थ्यसम्बन्धी विज्ञहरूले यस्ता समस्या प्रायः मानसिक स्वास्थ्यका विरामीहरूमा देखिने बताउँछन्। डा. रामचन्द्र रेड्डीले भने कि मानसिक रोगबाट पीडित व्यक्तिहरूको उचित हेरचाह र औषधिको नियमित सेवनमा अभिभावकको विशेष जिम्मेवारी रहेको छ। उनका अनुसार ती महिला मानसिक समस्याबाट पीडित थिइन् र मनोचिकित्सकको सल्लाहमा उपचार भइरहेको छ।