नेपाल र बंगलादेशबीच कीर्तिपुरमा ऐतिहासिक टी–२० अन्तर्राष्ट्रिय शृङ्खला आयोजना हुने

क्यान र बीसीबीको संयुक्त पहलमा सन् २०२७ सालको मार्च २६, २८ र ३० मा कीर्तिपुरमा नेपाल र बंगलादेशबीच तीन खेलको टी–२० अन्तर्राष्ट्रिय शृङ्खला आयोजना हुने भएको छ। यो शृङ्खला नेपालमा आएको विनाशकारी बाढीमा ज्यान गुमाएकाको स्मृतिमा समर्पित गरिनेछ।

नेपाल क्रिकेट संघ (क्यान) ले जारी गरेको विज्ञप्तिमा उल्लेख गरिएको छ कि कुनै पनि टेस्ट राष्ट्रले नेपालमा आइपुगेर शृङ्खला खेल्न लागेको यो पहिलोपटक हुनेछ। यसैले यो नेपालमा आयोजना हुने अहिलेसम्मकै सबैभन्दा ठूलो शृङ्खला हुनेछ। उक्त शृङ्खलाबाट दिवंगतप्रति श्रद्धाञ्जली अर्पण गर्ने साथै शोकसन्तप्त परिवार र विपद्प्रभावित समुदायप्रति एकता र सहानुभूति व्यक्त गरिनेछ।

क्यान र बीसीबीले क्रिकेटलाई दुई देशका जनतालाई जोड्ने महत्वपूर्ण माध्यमको रूपमा देख्दै यस शृङ्खलालाई मित्रता, मानवता र सहकार्यको विशेष सन्देश बोकेको प्रतियोगिता बनाउने निर्णय गरेका छन्। बीसीबीले नेपालको महिला क्रिकेट, उमेर समूह क्रिकेट र क्षमता अभिवृद्धि कार्यक्रमहरूमा सहयोग गर्ने प्रतिबद्धता जनाएको छ। साथै, भविष्यमा नेपाल ‘ए’ टोलीका भ्रमण र द्विपक्षीय ‘ए’ टोली शृङ्खलाको पनि प्रोत्साहन गरिनेछ।