अस्ट्रेलियाको क्यानबेरामा बिहीबार पाउलिन ह्यान्सन नेतृत्वको वन नेसन पार्टीविरुद्ध विद्यार्थीहरूले प्रदर्शन गरेका छन्। गारेमा प्लेसमा दिउँसो १ बजेदेखि ३ बजेसम्म ‘स्टुडेन्ट्स से नो टु ह्यान्सन’ नामक विरोध प्रदर्शन उच्च माध्यमिक विद्यालयका एन्टी–क्यापिटलिस्ट विद्यार्थीहरूले आयोजना गरेका थिए। वन नेसनले आगामी तीन वर्षमा अस्थायी भिसा ७ लाख ५० हजारभन्दा बढीले घटाउने नेट–नेगेटिभ माइग्रेसन योजना सार्वजनिक गरेपछि विद्यार्थीहरूले विरोध जनाएका हुन्।
अगस्ट १३ मा भएको विद्यार्थी आन्दोलनको दोस्रो चरणको रूपमा सेप्टेम्बर १७ मा गरिएको यो प्रदर्शनले अगस्ट महिनामा सिड्नी, मेलबर्न, ब्रिसबेन लगायतका शहरहरूमा उच्च माध्यमिक विद्यालय र विश्वविद्यालयका विद्यार्थीहरूले कक्षा छोडेर वन नेसन र ह्यान्सनको राजनीतिविरुद्ध सडक प्रदर्शन गरेको घटनालाई निरन्तरता दिएको छ। एबीसीको रिपोर्ट अनुसार, ती प्रदर्शनहरूमा प्रत्येक मुख्य शहरमा सयौं विद्यार्थीहरू सहभागी थिए। यसपटक पनि सिड्नी, मेलबर्न, ब्रिसबेन, एडिलेड, डार्विन र होबार्टलगायतका शहरहरूमा विद्यार्थीहरूले विरोध प्रदर्शन गरेका छन्।
एएपीको रिपोर्ट अनुसार, सिड्नीमा हजारभन्दा बढी सहभागी भएको विरोध कार्यक्रममा विद्यार्थीहरूले ह्यान्सनको आप्रवासन सम्बन्धी प्रस्तावको कठोर विरोध गरेका थिए। मेलबर्नमा पनि सयौं विद्यार्थी सहभागी भएका थिए। सेप्टेम्बर १४ मा वन नेसनले आगामी तीन वर्षमा अस्थायी भिसा ७ लाख ५० हजारभन्दा बढीले घटाउने नेट–नेगेटिभ माइग्रेसन योजना सार्वजनिक गरेको थियो, जुन पार्टीको आप्रवासन नीतिको मुख्य आधार मानिएको छ।
बिहीबारको प्रदर्शनमा सहभागी विद्यार्थीहरूले आप्रवासन, बहुसांस्कृतिकता तथा सामाजिक अधिकारसम्बन्धी वन नेसनले ल्याएको नीतिहरूको विरोध प्रकट गरेका थिए। अगस्टको प्रदर्शनपछि पुनः सडकमा आएको यो प्रदर्शन राष्ट्रिय विद्यार्थी युनियन र विभिन्न विद्यार्थी समूहहरूको आह्वानमा सम्पन्न भएको हो। कतिपय स्थानमा वन नेसन समर्थक र प्रदर्शनकारीबीच तनाव बढेपछि प्रहरीले हस्तक्षेप गर्नुपरेको थियो।
