१३ असोज, काठमाडौं। अन्तर्राष्ट्रिय क्रिकेट परिषद् (आईसीसी) ले सन् २०२७ को यू–१९ महिला विश्वकप सह–आयोजनाका लागि नेपालमा तयारी भइरहेकोमा सन्तुष्टि जनाएको छ। आईसीसीका इभेन्ट्स एन्ड अपरेशन्सका महाप्रबन्धक गौरव सक्सेनाको नेतृत्वमा गठित टोली नेपाल भ्रमणमा आएको थियो र माथिल्लो मुलपानी क्रिकेट मैदान तथा त्रिवि क्रिकेट मैदानको निरीक्षण गर्यो।
प्रतियोगिताको पूर्वतयारी र व्यवस्थापनको निरीक्षणपछि, सक्सेनाले नेपालमा क्रिकेटप्रतिको उत्साह विश्वका अन्य देशसँग तुलना गर्न सकिने गरी रहेको बताए र यू–१९ महिला विश्वकप यहाँ आयोजना गर्न पाउँदा आईसीसी उत्साहित रहेको स्पष्ट पारे। उनले भने, ‘नेपालमा क्रिकेटप्रति लगाव विश्वका कुनै पनि स्थानभन्दा कम छैन। यो प्रतियोगिताले सुन्दर देश नेपालसँग क्रिकेटको सम्बन्ध अझ सुदृढ बनाउने अवसर प्रदान गर्नेछ। हामी सफल र अविस्मरणीय प्रतियोगिता सञ्चालन गर्न उत्साहित छौं।’
सक्सेनाले यो निरीक्षण भ्रमण आईसीसी प्रतियोगिताको योजना तथा व्यवस्थापनको महत्वपूर्ण भाग भएको उल्लेख गर्दै हालसम्मको प्रगति प्रति टोली सन्तुष्ट रहेको बताए। उनका अनुसार प्रतियोगितालाई विश्वस्तरको बनाउन आवश्यक पूर्वाधार, संचालन र अन्य व्यवस्थापनका पक्षमा गहिरो छलफल गरिएको छ। उनले क्यानलाई निरन्तर समर्थनका लागि धन्यवाद दिँदै आगामी महिनाहरूमा आईसीसीले क्यानसँग नजिकबाट सहकार्य गर्दै प्रतियोगिताको तयारीलाई पूर्णता दिने विश्वास व्यक्त गरे। नेपालले सन् २०२७ मा आयोजना हुने आईसीसी यू–१९ महिला विश्वकपमा बंगलादेशसँग सह–आयोजकको रूपमा जिम्मेवारी पाएको छ।
