१६ असोज, तेल अवीव (रासस/एएनआई)। संयुक्त अरब इमिरेट्स (यूएई) ले इजरायली विमानलाई दुबईमा अवतरण गर्न अनुमति नदिएपछि इजरायलको प्रमुख विमान सेवा प्रदायक एल अलले दुबईमा अपतित रहेका नागरिकलाई स्वदेश फर्काउने शुक्रबारको उद्धार उडान रद्द गरेको छ। एल अलले एलवाई ९७४–१ र एलवाई ९७२ उडान रद्द गरिएको जानकारी दिएको छ। अर्को साताको लागि निर्धारित उडान भने निर्धारित समयमै रहेको र ती उडान पूर्ण रूपमा बुक भइसकेको कम्पनीले जनाएको छ।
इजरायली र इमिराती अधिकारीहरूबीच लामो छलफलपछि विमान अवतरणका लागि अन्तिम अनुमति प्राप्त हुन नसकेको जनाइएको छ। उडान रद्द हुनुको कारण सेप्टेम्बर ३० मा दुबईबाट तेल अवीवतर्फ गएको फ्लाई दुबईको विमानमा भएको गम्भीर सुरक्षा घटनापछि भएको हो। उक्त घटनामा ओमानी सहपाइलटले विमानका कमाण्डरमाथि आक्रमण गरी विमान तल झार्ने प्रयास गरेको आरोप लगाइएको छ। गम्भीर घाइते भए पनि क्याप्टेन स्मिट मच्छरले आक्रमणकारीको प्रतिरोध गरेका थिए।
चालक दल र यात्रुको सहयोगमा आक्रमणकारीलाई नियन्त्रणमा लिएपछि विमानको कमाण्ड पुनः कायम गरिएको थियो। विमानले साउदी अरबको तबुकमा आपत्कालीन अवतरण गरेको र १८० यात्रु सुरक्षित रहेको बताइएको छ। इजरायली प्रधानमन्त्री बेन्जामिन नेतान्याहुका अनुसार घटनाको बेला विमान इजरायली हवाई क्षेत्र नजिकै थियो। उनले क्याप्टेन मच्छरले सहपाइलटलाई नियन्त्रणबाट हटाउन सफल भएको र दुई गैर-ड्युटी उडानकर्मीले विमान सम्हालेको बताएका छन्।
सहपाइलट ओमानमा जन्मिएको र ओमानी नागरिक रहेको एक ओमानी अधिकारीले पुष्टि गरेका छन्। नेतान्याहुले सहपाइलट इस्लामवादी कट्टरपन्थी विचारबाट प्रभावित भएको अनुसन्धानबाट पुष्टि भएको दाबी गरेका छन्। अमेरिकी राष्ट्रपति डोनाल्ड ट्रम्पले सहपाइलटको तेहरानसँग सम्बन्ध हुन सक्ने सुनेको बताएका छन्। यद्यपि इरानको संलग्नताबारे निष्कर्षमा पुग्न थप समय लाग्ने नेतान्याहुले स्पष्ट पारेका छन्। इजरायली अधिकारीहरूले घटनाको थप अनुसन्धान गरिरहेका छन्। यसैबीच, युएईका लागि भारतका राजदूत दीपक मित्तलले क्याप्टेन मच्छरको अवस्था स्थिर रहेको र उनी यूएईको अस्पतालमा उपचाररत रहेको पुष्टि गरेका छन्। उनले क्याप्टेन मच्छरको साहसको प्रशंसा गर्दै सयौँ यात्रुको ज्यान जोगाउन उनले महत्त्वपूर्ण भूमिका खेलेको बताए।
