जनमतलाई दम्भ र प्रतिशोधको माध्यम बनाउने छुट छैन : रवि लामिछाने
चितवन — राष्ट्रिय स्वतन्त्र पार्टी (रास्वपा) का सभापति रवि लामिछानेले निर्वाचनबाट प्राप्त शक्तिलाई दम्भ र प्रतिशोधको माध्यम बनाउन नहुने बताएका छन्। शुक्रबार चितवनमा आयोजित पार्टी कार्यक्रममा सम्बोधन गर्दै लामिछानेले सरकारको नेतृत्व गरिरहेको दलका नेता तथा कार्यकर्ताले सत्ता र शक्तिको उन्मादमा नभई जिम्मेवारीबोधका साथ काम गर्नुपर्नेमा जोड दिए।
पार्टीका नेता तथा कार्यकर्ताको व्यवहार र कार्यशैलीलाई समाजले नजिकबाट नियालिरहेको उल्लेख गर्दै उनले सार्वजनिक रूपमा औँल्याइएका कमजोरी स्वीकारेर सुधार गर्नुपर्ने बताए। कमजोरी सच्याउँदै अघि बढ्नु नै राजनीतिक परिपक्वता भएको उनको भनाइ थियो। “सत्तामा छौं, ठूला पार्टीको नेता कार्यकर्ता हौं भनेर ठालू पल्टिने छुट कसैलाई छैन, त्यो हाम्रो राजनीतिक चरित्र पनि होइन,” लामिछानेले भने।
विगतमा रास्वपामा आबद्ध भएकै कारण आफ्ना नेता तथा कार्यकर्ताले राजनीतिक प्रताडना भोग्नुपरेको दाबी गर्दै उनले त्यसको बदलामा अहिले प्रशासन र प्रहरीमाथि राजनीतिक दबाब दिने काम स्वीकार्य नहुने बताए। विगतका सरकारबाट अपमान र प्रतिशोध भोगेको भन्दै उस्तै व्यवहार दोहोर्याउन नहुने उनको भनाइ थियो। त्यस्ता गतिविधिले पार्टीलाई दीर्घकालीन रूपमा अघि बढाउन नसक्ने उनले उल्लेख गरे।
जनताले दिएको अभिमत नागरिककै अपमान हुने गरी दुरुपयोग हुन नदिने प्रतिबद्धता पनि लामिछानेले व्यक्त गरे। उनले पार्टी र सरकारबीचको सम्बन्धमा दरार सिर्जना गर्न विभिन्न पक्ष सक्रिय रहेको दाबी गर्दै हल्ला र अफवाहमा विश्वास नगर्न नेता तथा कार्यकर्तालाई आग्रह गरे।