भारतको बिहारस्थित लखिसरायको अशोकधाम मन्दिरमा मच्चिएको भगदौडमा सात जना महिलाको मृत्यु भएको छ। जिल्ला अधिकारी शैलेन्द्र कुमारले बिजुलीको तार चुँडिएको अफवाहका कारण भगदौड सुरु भएको जानकारी दिएका छन्। घटनामा घाइते भएका छ जनालाई सदर अस्पतालमा उपचारका लागि भर्ना गरिएको छ। १ भदौ, काठमाडौं।
लखिसरायका सब डिभिजनल प्रहरी अधिकारी (एसडीपीओ) शिवम कुमारले सोमबार बिहान अशोकधाम मन्दिरमा उक्त घटना भएको जानकारी दिएका छन्। शिवम कुमारका अनुसार घटनामा अहिलेसम्म सात जनाको मृत्यु भइसकेको छ भने अन्य ६ जना घाइते भएका छन्। घाइतेहरूलाई सदर अस्पतालमा भर्ना गरिएको छ।
लखिसरायका जिल्ला अधिकारी शैलेन्द्र कुमार घाइतेहरूलाई हेर्न सदर अस्पताल पुगेका थिए। उनले त्यहाँ पत्रकारहरूसँग घटनाबारे जानकारी दिएका छन्। उनका अनुसार मृत्यु भएका सबै सात जना महिला हुन्। ‘अशोकधाम हल्ट रेलवे स्टेसनको ठीक अगाडिदेखि मन्दिरसम्म लामो लाइन लागेको थियो। त्यही बेला स्टेशनमा दुईवटा रेल पनि आइपुगे। यसै क्रममा विद्युत पोल ढलेको अफवाह फैलियो,’ उनी भन्छन्, ‘जबकि वास्तवमा केवल बिजुलीको तार मात्र चुँडिएको थियो,’ त्यसपछि बायाँतर्फ रहेको महिलाहरूको लाइनमा दबाब बढ्यो र महिलाहरू एकमाथि अर्को खस्दै गए।
