क्यानडा क्रिकेट टिमका मुख्य प्रशिक्षक मोन्टी देशाई पदबाट हटाइएका छन्। उनले सामाजिक सञ्जालमार्फत बिदाईको पुष्टि गर्दै धन्यवाद व्यक्त गरेका छन्। क्यानडाले मे महिनामा दोस्रो पटक देशाईलाई मुख्य प्रशिक्षक नियुक्त गरेको थियो, र लिग–२ अन्तर्गत चार खेल बाँकी रहँदा टोली शीर्ष चारबाट ६ अंकले पछि परेको छ।
देशाई नेपाली क्रिकेट टिमका पूर्व मुख्य प्रशिक्षक पनि हुन्। उनले आईसीसी क्रिकेट विश्वकप लिग–२ अन्तर्गत घरेलु मैदान तथा स्कटल्यान्डमा खेलेका दुई त्रिकोणात्मक सिरिजहरूमा टिमको जिम्मा सम्हालेका थिए। लिग–२ मा चार खेल बाँकी रहँदा क्यानडा शीर्ष चार भन्दा ६ अंकले तल पर्दा सन् २०२७ को एकदिवसीय विश्वकप यात्रामा टिमलाई विश्वकप क्वालिफायर प्ले–अफ खेल्नुपर्ने स्थिति आएको छ।
देशाईले सामाजिक सञ्जालमा आफ्नो बिदाईको पुष्टि गर्दै यो छोटो तर अर्थपूर्ण अध्याय भएको बताएका छन्। उनले भने, “छोटो अध्याय थियो, तर धेरै अर्थपूर्ण। दिगो सफलता समय, विश्वास, तयारी, बलियो सम्बन्ध र सामूहिक जिम्मेवारीबाट तयार हुन्छ भन्ने मेरो विश्वास अझै दृढ भएको छ। खेलाडी, सहयोगी स्टाफ र यस यात्रामा साथ दिने सबैलाई धन्यवाद।”
देशाईसँग दुई दशकभन्दा बढी अन्तर्राष्ट्रिय प्रशिक्षण अनुभव छ। उनले युएई, अफगानिस्तान, नेपाल र क्यानडाको राष्ट्रिय टिम सम्हालिसकेका छन्। नेपालमा उनको कार्यकाल सामान्यभन्दा विशिष्ट मानिन्छ। देशाईकै नेतृत्वमा नेपालले क्रिकेट विश्वकप लिग–२ मा ऐतिहासिक पुनरागमन गर्दै एकदिवसीय विश्वकप छनोट स्थान बनाएको थियो। उनी २०२४ टी–२० विश्वकपमा पनि नेपालको मुख्य प्रशिक्षकका रूपमा टिमको नेतृत्व गरेका थिए। यसैबीच, क्रिकेट क्यानडाले १५ अगस्टमा पाँच दिनअघि प्रशिक्षक पदका लागि आवेदन आह्वान गरेको छ।
सम्बन्धित खबर
