कप्तान दीपेन्द्र सिंह ऐरीले एसीसी पुरुष प्रिमियर कप र एसियन गेम्समा सहभागी हुनुपर्ने भएकाले युरोपियन टी–२० प्रिमियर लिग (ईटीपीएल) मा नखेल्ने भएका छन्। आम्सटर्डम फ्लेम्सले दीपेन्द्रको स्थानमा नेदरल्यान्ड्सका डेभिड रशमियरलाई टोलीमा समावेश गरेको छ।
फ्लेम्सले सामाजिक सञ्जालमार्फत दीपेन्द्र र नेपाली टोलीलाई प्रिमियर कप तथा एसियन गेम्सका लागि शुभकामना व्यक्त गर्दै ‘हामी टाइगरलाई समर्थन गर्नेछौं’ भनेको छ। यसअघि आम्सटर्डम फ्लेम्सले दीपेन्द्रलाई अस्ट्रेलियाका स्टार अलराउन्डर मिचेल मार्शको नेतृत्वमा अनुबन्ध गरेको थियो।
साथै, रोटरडम डर्क्सबाट अनुबन्धित नेपाली लेग स्पिनर सन्दीप लामिछाने पनि राष्ट्रिय टोलीको जिम्मेवारीका कारण प्रतियोगिता नखेल्ने सम्भावना रहेको छ। आईसीसीको स्वीकृति प्राप्त युरोपियन टी–२० प्रिमियर लिग युरोपका चार राष्ट्रमा आयोजना हुने बहुराष्ट्रिय फ्रेन्चाइज टी–२० प्रतियोगिता हो। यो प्रतियोगिता ईटीपीएलको पहिलो संस्करण हुनेछ।
