एनएसजेएफ पल्सर स्पोर्ट्स अवार्डको २३औं संस्करणको लागि नासा सेक्युरिटीज कम्पनी लिमिटेडले ‘स्टक ब्रोकरेज पार्टनर’को रूपमा आफ्नो सहकार्य जारी राखेको छ। भदौ १८ गते काठमाडौंमा आयोजना हुने अवार्ड कार्यक्रममा नासा सेक्युरिटीज सहप्रायोजकको रूपमा रहनेछ र मञ्चले कम्पनीलाई आधिकारिक स्टक ब्रोकरेज पार्टनरको रूपमा प्रचार गर्नेछ।
नेपाल खेलकुद पत्रकार मञ्च (एनएसजेएफ) र नासा सेक्युरिटीज बीच भएको सम्झौताअनुसार यस वर्ष पनि नासा सेक्युरिटीज अवार्डको ‘स्टक ब्रोकरेज पार्टनर’को रूपमा रहन लागेको हो। सम्झौतापत्रमा मञ्चका महासचिव अञ्जन खड्काले र नासा सेक्युरिटीजका अध्यक्ष मदन पौड्यालले हस्ताक्षर गरेका छन्।
यस वर्षको पिपुल्स च्वाइस अवार्डका मनोनयनहरूमा फुटबल खेलाडी पूजा राना, एमएमईबाट रविन्द्र ढाँट, क्रिकेट खेलाडी शेर मल्ल, भलिबलकी मिना सुनार र करातेकी सानु माया थिङ समावेश छन्। उनीहरूको लागि मतदान खल्ती वालेट, एनएसजेएफ स्पोर्ट्स अवार्डको फेसबुक पेज तथा पल्सर नेपालको फेसबुक पेज मार्फत गर्न सकिनेछ। एनएसजेएफ पल्सर स्पोर्ट्स अवार्ड २०८२ मा उत्कृष्ट पुरुष र महिला खेलाडी, युवा खेलाडी, प्रशिक्षक, पिपुल्स च्वाइस, लाइफटाइम अचिभमेन्ट, स्पेसल अवार्ड, पारा एथ्लिट अनर र एसियन स्पोर्ट्स जर्नलिस्ट अवार्ड गरी नौ विधामा सम्मान प्रदान गरिनेछ।
