८ भदौ, काठमाडौं । भारतको काक्रोच जनता पार्टी (सीजेपी) ले फेरि सडक प्रदर्शन गर्ने योजना घोषणा गरेको छ। नीट प्रश्नपत्र बाहिरिएको घटनापछि महिनौंसम्म आन्दोलन गरेर तत्कालीन शिक्षामन्त्री धमेन्द्र प्रधानलाई राजीनामा दिन बाध्य पार्न सफल सीजेपीले सेप्टेम्बर ५ मा पुनः सडकमा उत्रने तयारी गरेको छ।
सीजेपीले सेप्टेम्बर ५ मा इन्डिया गेटदेखि दिल्ली प्रहरी मुख्यालयसम्म शान्तिपूर्ण युवा मार्च आयोजना गर्ने जनाएको छ। सामाजिक सञ्जाल एक्समार्फत् सीजेपीले नरेन्द्र मोदी सरकार विद्यार्थी आन्दोलनका क्रममा प्रदर्शनकारीमाथि दर्ता भएका प्रहरी जाहेरी फिर्ता नगरेको आरोप लगाएको छ। तत्कालीन शिक्षामन्त्री प्रधानको राजीनामासँगै सरकारले विद्यार्थीमाथि दर्ता भएका एफआईआरहरू फिर्ता गर्ने सहमति पनि गरेका थिए।
