९ भदौ, काठमाडौं । रूसका विदेशमन्त्री सर्गेई लाभरोभ र भ्याटिकनका विदेशमन्त्री आर्किबिशप पल रिचर्ड ग्यालाघेरबीच मङ्गलवार मस्कोमा वार्ता हुँदैछ। विशेष सैन्य अभियान सुरु भएयता भ्याटिकनका उच्च अधिकारीद्वारा गरिएको यो पहिलो आधिकारिक रूस भ्रमण हो। रूसको विदेश मन्त्रालयले जनाएको छ कि दुई पक्षले अन्तर्राष्ट्रिय विषयहरू र द्विपक्षीय सहयोगका संभावनाहरूमा छलफल गर्नेछन्। यस वार्तामा युक्रेन मुद्दालाई विशेष प्राथमिकतामा राखिने अपेक्षा गरिएको छ। साथै, यस क्रममा भ्याटिकनमा युक्रेनसम्बन्धी छुट्टै परामर्श हुने सम्भावनासमेत रहेको छ। भ्याटिकनका लागि रूसका राजदूत इभान सोल्तानोभ्स्कीले समाचार संस्था ताससँग कुराकानी गर्दै रूस त्यस्तो परामर्श प्रक्रियामा सहभागी हुन इच्छुक रहेको बताएका छन्।
