रसुवाको गोसाइँकुण्ड तीर्थयात्रामा गएका धादिङका २७ तीर्थयात्री र बस चालक बुधबारदेखि भीषण बाढीपछि सम्पर्कविहीन भएका छन्। बाढीअघि चालक छविलाल श्रेष्ठले ‘बाढीले गाडी बगायो, हामी छतमा छौं’ भनेको अन्तिम खबर परिवारले पाएका थिए। सालबोटे र गैरी टोलका आफन्तले खोजी तथा उद्धारका लागि पहल गरिरहेका छन्, तर अहिलेसम्म भरपर्दो सूचना आएको छैन। ११ भदौ, धादिङ।
रसुवाको गोसाइँकुण्ड तीर्थयात्रामा निस्किएका धादिङका एकै क्षेत्रका २७ जना तीर्थयात्री र बस चालक भीषण बाढीपछि सम्पर्कविहीन भएका छन्। बुधबार बिहानदेखि सम्पर्कविहीन उनीहरूका कारण नीलकण्ठ नगरपालिका–९ को सालबोटे र वडा नम्बर १२ को गैरी टोलमा गहिरो सन्नाटा छाएको छ। धादिङबेँसीबाट तीर्थयात्री बोकेर रसुवातर्फ गएको बा ५ ख १२५० नम्बरको बस र चालकसहित यात्रुहरू नुवाकोटको बेत्रावती पुगेपछि सम्पर्कविहीन भएका हुन्।
पारिवारिक स्रोतका अनुसार बस बुधबार बिहान करिब ९:१५ बजे बेत्रावती पुगेको जानकारी प्राप्त भएको थियो। त्यसपछि तिब्बती क्षेत्रबाट भोटेकोसी नदीमा आएको भीषण बाढीका कारण सडक, पुल र सञ्चार सम्पर्क विच्छेद भएपछि उनीहरूसँग सम्पर्क हुन सकेको छैन। अन्तिम फोन कलमा यात्रामा रहेका प्रकाश लम्सालले ‘बाढीले गाडी बगायो, हामी घरको छतमा छौं’ भनेका थिए। तर, त्यसको केही समयपछि फोन सम्पर्क पूर्ण रूपमा विच्छेद भयो।
स्थानीय प्रकाश खनालका अनुसार खोजी तथा उद्धारका लागि सबै स्रोत र पहुँच प्रयोग गरिरहेका छन्। ‘अहिलेसम्म कतैबाट पनि भरपर्दो सूचना आएको छैन,’ उनले भने। सम्पर्कविहीन तीर्थयात्रीहरूमा नीलकण्ठ नगरपालिका–१२ का छविलाल श्रेष्ठ (बस चालक), दयाराम लम्साल र सीता लम्साल, ठाकुर लम्साल र शारदा लम्साल, प्रकाश लम्साल र इन्दिरा लम्साल, नीलकण्ठ नगरपालिका–९ का राम लम्साल र जानुका लम्साल, कृष्णप्रसाद खनाल र राधिका खनाल, रामचन्द्र खनाल र भगवती खनाल, शिवहरि लम्साल र गायत्री लम्साल, नारायणप्रसाद लम्साल र सीता लम्साल, राजन लम्साल र न्याउरी लम्साल, सिद्धलेक गाउँपालिका–१ का हरिप्रसाद सिलवाल र बिन्दा सिलवाल, घनश्याम भट्ट र कल्पना भट्ट, नीलकण्ठ नगरपालिका–३ का सीता तिवारी, तुलसी तिमल्सिना र ईश्वरी तिमल्सिना रहेका छन्।
