रसुवाको बाढीले त्रिशूली बजारको त्रिभुवन त्रिशूली माध्यमिक विद्यालय बगाए पनि, प्रधानाध्यापक र कर्मचारीहरूले सबै विद्यार्थीलाई पहिले नै सुरक्षित स्थानतर्फ लगाइसकेका थिए। प्रधानाध्यापक राजेन्द्र दवाढीसहित करिब ५० जना डाँडातिर अलपत्र परेका थिए र उनीहरूको उद्धार बाढी गएको तेस्रो दिन भएको छ। विद्यालयका दुई कर्मचारी र एक शिक्षक सम्पर्कविहीन छन् भने बिदुर नगरपालिका-९ मा अझै करिब १५ जना विद्यार्थी उद्धारको पर्खाइमा छन्।
रसुवा बाढीका कारण त्रिशुली बजारको त्रिभुवन त्रिशुली माध्यमिक विद्यालय बगायो। तर, विद्यालयका प्रधानाध्यापक र अन्य कर्मचारीहरूको सक्रियताका कारण त्यहाँका सबै विद्यार्थी बाढी आउनु अगावै स्कुलबाट सुरक्षित गरिएका थिए। स्कुलभित्र कोही विद्यार्थी बग्न पाएका छैनन्। यद्यपि, स्कुलबाट डाँडातिर भाग्दा विद्यालयको एउटा समूह अलपत्र अवस्थामा थियो। प्रधानाध्यापक राजेन्द्र दवाडीका अनुसार, “आज हामी बच्चाहरूसहित सुरक्षित उद्धार भएका छौं। सबैजना सुरक्षित नै छन्।”
उद्धारको अवस्थाबारे उनले भने, “हामी अहिले सुरक्षित स्थानमा छौं। यहाँ मेरो घर छ। पहिले जुन स्थानमा बस्यौं त्यहाँ बिजुली पनि थिएन।” उनले थपे, “अहिलेसम्म करिब १५ जना विद्यार्थी उद्धारको पर्खाइमा रहेका छन्। मैले उद्धारका लागि सेनालाई पनि जानकारी गराइसकेको छु।”
अलपत्र रहेका विद्यार्थीहरूको अवस्था कस्तो होला भन्ने प्रश्नमा उनले भने, “करिब दुई–तीन शिक्षक उनीहरूसँग छन्। प्रशासनमा कुरा भइसकेको छ। चाँडै उद्धार गर्ने तयारी भइरहेको छ।”
