चीनसँगको रसुवागढी सीमासँगै आएको बाढीले त्यस क्षेत्रमा रहेको विभिन्न जलविद्युत् आयोजनाका करिब १,००० जनाभन्दा बढी कार्यरत कर्मचारीहरू अझै सम्पर्कविहीन रहेको आशंका ऊर्जा मन्त्रालयका प्रवक्ताले जनाएका छन्। राष्ट्रिय विपद् जोखिम न्यूनीकरण प्राधिकरणले जलविद्युत् आयोजनाहरूबाट मात्रै ९३३ जना सम्पर्कविहीन रहेको उल्लेख गरेको छ। तीमध्ये ४०० भन्दा बढी व्यक्ति विभिन्न जलविद्युत् आयोजना सुरुङभित्रै फसेको र उनीहरूको उद्धारको प्रयास भइरहेको मन्त्रालयले जनाएको छ। मन्त्रालयले शुक्रबार विभिन्न जलविद्युत् आयोजनाका प्रवर्धकहरू सँग छलफलपछि सम्पर्कबिहीन र फसेका मानिसहरूको विवरण अद्यावधिक गर्ने काम भइरहेको बताएको छ।
ऊर्जा मन्त्रालयका प्रवक्ता मोहन शाक्यले कोरियाली लगानीको अपर त्रिशूली-१ जलविद्युत् आयोजनामा मात्रै ४०० भन्दा बढी मानिसहरू सुरुङभित्रै फसेको अनुमान गरिएको बताए। “जलविद्युत् आयोजनामा कार्यरत करिब १,००० भन्दा बढी व्यक्ति सम्पर्कविहीन छन्,” शाक्यले भने। “अत्यधिक संख्या अपर त्रिशूली १ मा छन् जहाँ करिब ४०० जना सुरुङमै फसेको प्रारम्भिक जानकारी प्राप्त भएको छ। सुरुङबाहिर रहेका १७६ जना सम्पर्कविहीन छन्।”
आयोजनाका सम्पर्क अधिकारी गिरी अधिकारीले भने, आयोजनाको १० किलोमिटर लामो सुरुङको मुखबाट लेदो पस्दा उद्धारमा कठिनाइ आएको छ। “यो सुरुङ ब्रेक थ्रू (वारपार) भइसकेको छ। आपत्कालीन प्रवेश मार्ग (अडिट टनेल) बन्द छैनन् जसले भित्र अक्सिजनको कमी नहुने देखिन्छ। तर खाना र पानीको अभाव छ। यदि समयमै उद्धार भयो भने भित्र फसेकाहरू जीवित रहने सम्भावना छ,” अधिकारीले जानकारी दिए।
उनका अनुसार सुरुङभित्रबाट बिहीबार चार जना कामदारहरू आफ्नै प्रयासमा बाहिर निस्केका थिए। उनीहरूले सुरुङभित्र करिब ४०० जनाको उपस्थिति बताए र त्यही दिन सुरुङभित्र काम गर्ने व्यक्तिहरूको संख्या पनि त्यति नै देखिएको छ। सुरुङ प्रवेश गर्ने सबै बाटो बगाईसकिएपछि भीरमा हेलिकप्टरमा झुन्डिएर मात्रै सुरुङभित्र पुग्न सकिने अवस्था आएको आयोजनाका सम्पर्क अधिकारीले बताए।
