१४ भदौ, काठमाडौं । नेकपा (एमाले) का अध्यक्ष केपी शर्मा ओलीले भोटेकोशी बाढीबाट प्रभावितहरूको उद्धार, राहत तथा पुनर्निर्माण कार्य प्रभावकारी बनाउन पार्टीका सबै संयन्त्रलाई परिचालन गर्न निर्देशन दिएका छन् । आइतबार ललितपुरको च्यासलस्थित पार्टी केन्द्रीय कार्यालयमा महासचिव शंकर पोखरेल नेतृत्वको टोलीले रसुवाका बाढीपहिरो प्रभावित क्षेत्रको स्थलगत अनुगमन गरी बुझाएको प्रतिवेदन अध्यक्ष ओलीले ग्रहण गर्दै उक्त निर्देशन दिएका हुन् । अध्यक्ष ओलीले पार्टीले खाद्यान्न, कपडा र अन्य राहत सामग्री सङ्कलन गरी प्रभावित क्षेत्रमा पठाउने कार्य जारी रहेको जानकारी पनि दिएका छन् ।
उनीहरूले भनेका छन् कि पार्टीले गरिरहेको मानवीय कार्य र राहत अभियानलाई ओझेलमा पारेर बदनाम गर्ने नियतले कतिपय तत्वहरू सक्रिय रहेको आरोप छ । प्राकृतिक विपत्तिको अवस्था सम्बन्धमा छलफल गर्दै अध्यक्ष ओलीले रसुवा र सिन्धुपाल्चोकमा बाढी वर्षाका कारण मात्र नभई ‘ग्लेसियर’ वा हिमताल विष्फोट भएको हुनसक्ने प्रारम्भिक अनुमान व्यक्त गरेका छन् । उद्धार र राहत कार्यमा समन्वयको कमी देखिएको भन्दै अध्यक्ष ओलीले सरकारको कार्यशैलीमा पनि आलोचना गरेका छन् ।
केही मन्त्रीहरूले पूर्वतयारी र व्यवस्थापनबिना सुरक्षित स्थानमा रहेका मानिसहरूलाई अन्यत्र सार्दा उनीहरू अझ थप अलपत्र परेको र पीडितहरूमा आक्रोश बढेको उनले बताएका छन् । नुवाकोट र रसुवाका पार्टी पदाधिकारी तथा स्थानीय जनप्रतिनिधिहरूका परिवारका सदस्य अझै बेपत्ता रहेको पीडादायी अवस्था सुनाउँदै उनले सबैलाई धैर्यताका साथ उद्धार कार्यमा लाग्न आग्रह गरेका छन् । ‘छोटो दूरीको खोलामा वर्षाले मात्र यति ठूलो सतह बढ्न सक्दैन । यो हिमपहिरो वा हिमताल फुटेर आएको विनाशकारी बाढी जस्तो देखिन्छ, जसले पहिले नै क्षतिग्रस्त क्षेत्रमा थप जोखिम निम्त्याएको छ । सुरक्षित स्थानमा रहेका व्यक्तिलाई खाना र आवासको व्यवस्थापन नगरी अन्यत्र सार्दा समस्या अझ जटिल बनेको छ,’ अध्यक्ष ओलीले बताए ।
