रास्वपाको आह्वानमा सिंहदरबारमा बसेको सर्वदलीय बैठकले राहत, उद्धार र पुनःस्थापनामा सरकारसँग समन्वय गरेर अघि बढ्ने निर्णय गरेको छ। बैठकले केन्द्रमा गठन भएको राजनीतिक सञ्जाललाई सबै तहमा विस्तार गर्ने र बागमती प्रदेशदेखि बाढी प्रभावित जिल्ला तथा पालिकामा संयन्त्र गठन गर्ने सहमति गरेको छ। एमाले, नेकपा र कांग्रेसका नेताहरूले सुरुङमा फसेका वा थुनिएका व्यक्तिको उद्धारका लागि सरकारलाई अन्तर्राष्ट्रिय, प्राविधिक र विज्ञ सहयोग लिन सुझाव दिएका छन्। मिति १६ भदौ, काठमाडौं।
सर्वदलीय बैठकले राहत, उद्धार र पुनःस्थापनामा सरकारसँग समन्वय गरी अघि बढ्ने सहमति व्यक्त गरेको छ। रास्वपाको आह्वानमा मंगलबार सिंहदरबारमा बसेको उक्त बैठकले विपद्को समयमा एकताबद्ध भएर राहत, उद्धार र पुनःस्थापनामा सरकारसँग मिलेर काम गर्ने निर्णय गरेको हो। बैठकपछि रास्वपा प्रवक्ता जगदिश खरेलले खोजी, उद्धार र राहतका विषयमा विभिन्न राजनीतिक दलहरूबाट प्राप्त सुझाव र प्रतिक्रियाहरूलाई गम्भीरतापूर्वक लिइएको जानकारी दिए। उनले केन्द्रमा गठन भएको राजनीतिक सञ्जाललाई सबै तहमा विस्तार गर्ने सहमति भएको बताए।
त्यस्तै, यस्ता सर्वदलीय बैठक र संयन्त्रहरू बागमती प्रदेशसहित बाढी प्रभावित सबै जिल्ला तथा स्थानीय तहहरूमा पनि गठन गरिने उहाँले बताए। यी संयन्त्रहरूको मुख्य उद्देश्य ती तहका सरकारहरूले सञ्चालन गरिरहेका विपद् व्यवस्थापनसम्बन्धी कार्यमा सहयोग र सहजीकरण गर्नु रहेको छ। सम्पूर्ण बस्ती सार्न तीनै तहका सरकार, नागरिक, प्रभावित समुदाय तथा राजनीतिक दलहरूबीच राष्ट्रिय सहमति आवश्यक भएकाले उच्चस्तरीय राजनीतिक संयन्त्रलाई निरन्तरता दिँदै अघि बढ्ने सहमति भएको पनि प्रवक्ता खरेलले स्पष्ट पार्नुभयो।
बैठकपछि एमाले नेता प्रदीप ज्ञवालीले प्रभावित क्षेत्रका पीडित नागरिकलाई राहत वितरणमा सरकारले गम्भीर भूमिका खेल्नुपर्ने र सुरुङमा फसेका व्यक्तिको उद्धारका लागि अन्तर्राष्ट्रिय सहयोग लिन सुझाव दिनुभयो। नेकपा नेता वर्षमान पुनले सुरुङमा थुनिएका मजदुरको उद्धारमा विज्ञहरू परिचालन गर्नुपर्ने तथा निजी क्षेत्र र विदेशी कम्पनीहरूलाई उद्धार कार्यमा खुला पार्नुपर्ने बताए। कांग्रेसका प्रवक्ता देवराज चालिसेले सुरुङमा थुनिएका व्यक्तिको खोजी र उद्धारमा सरकारले अन्य राष्ट्रसँग प्राविधिक सहयोग लिनुपर्ने बताए।
