नेपाल वनस्पति घिउतेल उत्पादक संघले बाढीपहिरो पीडितहरूको राहत र उद्धारका लागि प्रधानमन्त्री दैवी प्रकोप उद्धार कोषमा १ करोड १ लाख रुपैयाँ सहयोग गर्ने निर्णय गरेको छ। संघले १० भदौको बाढीबाट रसुवा, नुवाकोट, धादिङ, चितवन र पूर्वी नवलपरासीमा भएको मानवीय र भौतिक क्षतिबारे जानकारी दिएको छ। प्रभावित परिवारलाई तत्काल राहत, घाइतेहरूको उपचार र अन्य सहयोग छिटो उपलब्ध गराउन सरकार र सम्बन्धित निकायहरूको ध्यानाकर्षण गराएको छ।
संघले बुधबार बाढीपहिरोले पुर्याएको मानवीय एवं भौतिक क्षतिप्रति दुःख व्यक्त गर्दै सहयोग रकम उपलब्ध गराउने निर्णय गरेको हो। १० भदौ बुधबार बिहान चीनको सिजाङ (तिब्बत) तर्फबाट आएको भीषण बाढीका कारण रसुवा, नुवाकोट, धादिङ, चितवन र पूर्वी नवलपरासी लगायत जिल्लामा ठूलो मानवीय र भौतिक क्षति भएको थियो। यस प्राकृतिक विपत्तिमा परी धेरै नागरिकको ज्यान गएको, बेपत्ता भएका, घाइते भएका साथै सार्वजनिक तथा निजी सम्पत्तिमा अपूरणीय क्षति पुगेको प्रति संघले ध्यानाकर्षण गराएको छ।
संघले भन्यो, ‘यस्ता संवेदनशील अवस्थामा राष्ट्रिय एकता, सामाजिक सहकार्य र मानवीय भावनालाई आत्मसात गर्दै नागरिक, समाज र राष्ट्रप्रतिको जिम्मेवारी बोध गर्दै संघ तथा सदस्य उद्योगहरूले एकमुश्त १ करोड १ लाख रुपैयाँ प्रधानमन्त्री राहत कोषमा जम्मा गर्ने निर्णय गरेका छौं।’ साथै संघले प्रभावित परिवारलाई तत्काल राहत, घाइतेहरूको उपचार र आवश्यक सहयोग छिटोभन्दा छिटो उपलब्ध गराउन सरकार र सम्बन्धित निकायहरूको ध्यानाकर्षण गराएको छ।
सामाजिक उत्तरदायित्वमा सधैं अग्रसर रहने प्रतिबद्धता व्यक्त गर्दै संघले आगामी दिनमा पनि यस्ता सहयोगात्मक कार्यहरूमा निरन्तर संलग्न रहने जनाएको छ। सबै सम्बन्धित पक्षको संवेदनशीलता र सहयोगले मात्र प्रभावित क्षेत्रको पुनर्निर्माणमा गतिशीलता ल्याउन सकिने संघको ठहर छ।
