समाचार सारांश: एनएसजेएफ पल्सर खेलकुद पुरस्कार २०८२ बिहीबार भृकुटीमण्डपस्थित नेपाल पुलिस क्लबको ब्लू पभेलियन हलमा आयोजना हुँदैछ। नेपाल खेलकुद पत्रकार मञ्चले यस पुरस्कारको २३औं संस्करण बाढीपीडित प्रभावितहरूलाई समर्पित गरेको छ। पुरस्कार ९ विधामा प्रदान गरिनेछ र केही विधाका विजेता र मनोनयनहरू सार्वजनिक भएका छन्। १८ भदौ, काठमाडौं।
नेपाल खेलकुद पत्रकार मञ्चको आयोजनामा एनएसजेएफ पल्सर खेलकुद पुरस्कार २०८२ बिहीबार आयोजना हुँदैछ। पुरस्कारको २३औं संस्करण राजधानीको भृकुटीमण्डपस्थित नेपाल पुलिस क्लबको ब्लू पभेलियन हलमा हुनेछ। यस पटक पुरस्कार बाढीपीडित प्रभावितहरूलाई समर्पित गरिएको छ। मञ्चले यस पुरस्कारमार्फत खेलाडी, प्रशिक्षक र खेलकर्मीहरूलाई सम्मान र पुरस्कृत गर्ने गरेको छ, जुन नेपाली खेलकुद क्षेत्रको सर्वाधिक प्रतिष्ठित कार्यक्रम मानिन्छ।
यस वर्ष पुरस्कार ९ विधामा प्रदान गरिनेछ, जसमा वर्षको उत्कृष्ट पुरुष खेलाडी, महिला खेलाडी, युवा खेलाडी, प्रशिक्षक, पिपल्स च्वाइस अवार्ड, लाइफटाइम अचिभमेन्ट अवार्ड, स्पेसल अवार्ड, पारा एथलिट र एसियन स्पोर्ट्स जर्नालिस्ट अवार्ड समावेश छन्। वर्ष पुरुष खेलाडीको मनोनयनमा चन्द्रबहादुर थापा (बक्सिङ), सोमबहादुर कुमाल (एथलेटिक्स), प्रदीप बजाइली मगर (कराते), दीपेन्द्रसिंह ऐरी (क्रिकेट) र सद्भाव आचार्य (गल्फ) रहेका छन्। वर्ष महिला खेलाडीका मनोनयनमा एरिका गुरुङ (कराते), सानुमाया थिङ (कराते), सन्तोषी श्रेष्ठ (एथलेटिक्स), साबित्रा भण्डारी (फुटबल) र सबिना श्रेष्ठ (कराते) रहेका छन्।
वर्ष युवा खेलाडीको प्रतिस्पर्धामा अर्पिल राना (बक्सिङ), रेहान जावेद (कराते), मनीषाकुमारी बोहरा (कराते), पुरुषोत्तम सिलवाल (चेस) र रौनक श्रीवास्तव (क्रिकेट) छन्। वर्ष प्रशिक्षकको मनोनयनमा दीपक महर्जन (बक्सिङ), कुशल श्रेष्ठ (कराते), मण्डेकाजी श्रेष्ठ (कराते), स्टुआर्ट ल (क्रिकेट) र पुरन सिंह खत्री (दृष्टिविहीन महिला क्रिकेट) रहेका छन्। पिपल्स च्वाइससहित ५ विधाका मनोनयनहरू सार्वजनिक भइसकेका छन्। पिपल्स च्वाइसमा फुटबलकी पूजा राना, मिक्स मार्सल आर्ट्स (एमएमए) का रवीन्द्र ढाँट, क्रिकेटका शेर मल्ल, भलिबलकी मीना सुनार र करातेकी सानुमाया थिङ प्रतिस्पर्धामा छन्। लाइफटाइम अचिभमेन्ट अवार्ड, स्पेसल अवार्ड, पारा एथलिट र एसियन स्पोर्ट्स जर्नालिस्ट अवार्डका विजेताहरू कार्यक्रमकै क्रममा घोषणा गरिनेछ। उक्त कार्यक्रम हिमालय टेलिभिजन र एनएसजेएफको आधिकारिक फेसबुक पेजबाट प्रत्यक्ष प्रशारण गरिनेछ।
