नेपालले मलेसियामा जारी एसीसी प्रिमियर कपको सेमिफाइनलमा बिहीबार बिहान सवा ७ बजे ओमानसँग प्रतिस्पर्धा गर्नेछ। नेपाल समूह ‘ए’ को विजेता र ओमान समूह ‘बी’ को उपविजेता भएर सेमिफाइनलमा पुग्न सफल भएका छन्। उपाधि विजेता टोली एसीसी एसिया कपमा छनोट हुनेछ भने दुई फाइनलिस्ट र तेस्रो स्थान हासिल गर्ने टोली इमर्जिङ टिम्स एसिया कपमा छनोट हुनेछन्। २४ भदौ, काठमाडौं। मलेसियामा जारी एसीसी प्रिमियर कपको सेमिफाइनलमा नेपालले बिहीबार बिहान ओमानसँग प्रतिस्पर्धा गर्नेछ। मलेसियाको बायुमास क्रिकेट ओभलमा हुने उक्त खेल नेपाली समय अनुसार सवा ७ बजेबाट सुरु हुनेछ। नेपाल समूह ‘ए’ को विजेताका रूपमा सेमिफाइनलमा पुगेको हो भने ओमान समूह ‘बी’ को उपविजेताका रूपमा मैदानमा हुनेछ।
मंगलबार समूह चरणको अन्तिम खेलमा नेपाल हङकङसँग पराजित भए पनि समूहको विजेताका रूपमा रहँदा, ओमान यूएई र कुवेतसँग पछि परे पनि समूह ‘बी’ मा उपविजेता बन्न सफल भयो। नेपालले समूह चरणमा बहराइन, मलेसिया र साउदी अरेबियालाई पराजित गरेको थियो भने अन्तिम खेलमा हङकङसँग हार ब्यहोरेको थियो। त्यसपछि पनि नेपाल समूह विजेता घोषित भएको थियो। समूह ‘ए’ को उपविजेता हङकङले पनि बिहीबार हुने सेमिफाइनलमा समूह ‘बी’ को विजेता यूएईसँग प्रतिस्पर्धा गर्नेछ। यस प्रतियोगिताको उपाधि जित्ने टोली एसीसी एसिया कपमा छनोट हुनेछ भने इमर्जिङ टिम्स एसिया कपका लागि दुई फाइनलिस्ट टोली स्वत: छनोट हुनेछन्। फाइनल पुग्न नसक्ने दुई टोली तेस्रो स्थानका लागि प्रतिस्पर्धा गर्नेछन् र तेस्रो स्थान हासिल गर्ने टोली पनि इमर्जिङ टिम्स एसिया कपका लागि छनोट हुनेछ।
