२०औं एसियन गेम्सअन्तर्गत टोकियो एक्वाटिक्स सेन्टरमा भएको स्वीमिङ प्रतियोगितामा नेपालका जिदेन श्रेष्ठ, आर्या महर्जन, डुवाला लामा र इर्भिन श्रेष्ठ हिट चरणबाट बाहिरिएका छन्। सय मिटर ब्रेस्टस्ट्रोकमा जिदेन ३६ प्रतिस्पर्धीमध्ये ३०औं र महिला ५० मिटर ब्रेस्टस्ट्रोकमा आर्या ३१ प्रतिस्पर्धीमा २७औं स्थानमा रहेकी छिन्। महिला २०० मिटर फ्रिस्टाइलमा डुवाला २१ प्रतिस्पर्धीमध्ये १९औं स्थानमा छिन्। पुरुष ५० मिटर फ्रिस्टाइलमा इर्भिन ४७ प्रतिस्पर्धीमध्ये ३८औं स्थानमा रहेका छन् र उनले २४.५६ सेकेन्डमा दूरी पूरा गरेका छन्।
५ असोज, काठमाडौं। २०औं एसियन गेम्स अन्तर्गत स्वीमिङमा नेपालका चार खेलाडी हिट चरणबाट बाहिरिएका छन्। जापानको टोकियो एक्वाटिक्स सेन्टरमा सोमबार बिहान सम्पन्न प्रतिस्पर्धामा नेपालका जिदेन श्रेष्ठ, आर्या महर्जन, डुवाला लामा र इर्भिन श्रेष्ठ हिट चरणबाट बाहिरिएका हुन्। सय मिटर ब्रेस्टस्ट्रोक विधामा नेपालका जिदेन ३६ प्रतिस्पर्धीमध्ये ३०औं स्थानमा रहे। उनले निर्धारण गरिएको दूरी १ मिनेट ०८.०१ सेकेन्डमा पूरा गरे। महिला ५० मिटर ब्रेस्टस्ट्रोकमा नेपालकी आर्या महर्जन हिट चरणमै रोकिइन्। उनले ३३.४० सेकेन्डमा दूरी पूरा गर्दै ३१ प्रतिस्पर्धीमध्ये २७औं स्थान हात पारेकी छन्।
त्यसैगरी महिला २०० मिटर फ्रिस्टाइलमा नेपालकी डुवाला लामा २१ प्रतिस्पर्धीमध्ये १९औं स्थानमा रहेकी छिन्। उनले निर्धारित दूरी २ मिनेट १५.४० सेकेन्डमा पूरा गरिन्। पुरुष ५० मिटर फ्रिस्टाइलमा नेपालका इर्भिन श्रेष्ठ ४७ प्रतिस्पर्धीमध्ये ३८औं स्थानमा रहेका छन्। उनले २४.५६ सेकेन्डमा दूरी पूरा गरेका थिए। यसअघिको आइतवार भएको सय मिटर फ्रिस्टाइलमा पनि इर्भिन ३६औं स्थानमा रहँदै हिट चरणबाट बाहिरिनु परेको थियो। उनले ५४.०३ सेकेन्डमा दूरी पूरा गरेका थिए। सोही विधामा अविभ प्रधानले ५२.७४ सेकेन्डमा दूरी पूरा गर्दै २८औं स्थान निकालेका थिए। स्वीमिङका अझै केही विधामा नेपालको प्रतिस्पर्धा बाँकी छ।
