कोशी प्रदेशका सांसदहरूले पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको रिहाइको माग गरेका छन्। सांसदहरूले यी नेताहरूलाई राजनीतिक प्रतिशोधका कारण पक्राउ गरिएको आरोप लगाउँदै भदौ २३ र २४ का घटनाहरूको छानबिन गर्न गठन गरिएको आयोगको प्रतिवेदन पूर्वाग्रही भएको बताएका छन्। नयाँ सरकारले फरक मत भएका नेतामाथि राजनीतिक प्रतिशोध गर्दै देशलाई अस्थिर बनाउन सक्ने खतरा सांसदहरूले औँल्याएका छन्।
१५ चैत, विराटनगर। कोशी प्रदेशका सांसदहरूले पूर्वप्रधानमन्त्री तथा नेकपा एमाले अध्यक्ष केपी शर्मा ओली र पूर्वगृहमन्त्री तथा नेपाली कांग्रेसका नेता रमेश लेखकको रिहाइको माग उठाएका छन्। भदौ २३ र २४ गतेको घटनाहरू दमन गरेको आरोपमा ओली र लेखक शनिबार पक्राउ परेका थिए। आइतबारको प्रदेश सभा बैठकमा सांसदहरूले उनीहरूको गिरफ्तारी राजनीतिक बदला लिने उद्देश्यले भएको भन्दै रिहाइको माग गरेका हुन्।
सांसद डोल्मा तामाङ, सिर्जना राई, किशोरचन्द्र दुलाल, मीना श्रेष्ठ, गीतादेवी रेग्मी, खगेश्वरी पौडेल र होमबहादुर थापाले नयाँ सरकार गठनसँगै पक्राउ थाल्नु गलत भएको उल्लेख गर्दै तत्काल रिहाइको माग गरेका छन्। उनीहरूले यसले देशमा अस्थिरता निम्त्याउन सक्ने चेतावनी दिएका छन्। विशेष समयमा बोल्दै एमाले सांसद तिलकुमार मेन्यांग्बोले नेताहरूको गिरफ्तारीलाई आपत्तिजनक भनेका छन्। उनले भदौ २३ र २४ की घटनाहरूको छानबिन गर्न गठन गरिएको आयोगको प्रतिवेदनले देशलाई द्वन्द्वतर्फ धकेल्न सक्ने खतरा औँल्याएका छन्।
