फुटबलर मोहम्मद सालाहलाई चालकको पहिचान नदिनुका कारण ६ महिनाका लागि सवारी चलाउन प्रतिबन्ध लगाइएको छ। मार्च २७ मा चेशायरको विल्म्स्लोमा ३० माइल प्रति घण्टा गति सीमामा सालाहको रोल्स–रोयस कारलाई स्पिड क्यामेराले ३६ माइल प्रति घण्टा (करिब ५८ किलोमिटर प्रति घण्टा) गतिमा चलिरहेको रेकर्ड गरेको थियो। अदालती कागजातअनुसार प्रहरीले कार चलाउने व्यक्तिको पहिचान माग्दा ३४ वर्षीय सालाहले अभियोजनसम्बन्धी कुनै जानकारी वा बयान नदिएका छन्।
वारेन्टन संयुक्त अदालतको सुनुवाईमा सालाहलाई ६ महिनाको ड्राइभिङ प्रतिबन्धसहित १ हजार ४४ पाउन्ड जरिवाना तिर्न आदेश दिइयो। अदालतकी प्रवक्ताले बताएअनुसार सालाहमाथि ‘सिङ्गल जस्टिस प्रोसिजर’ अन्तर्गत मुद्दा चलाइएको थियो, जहाँ मजिस्ट्रेटले निजी सुनुवाइ गरेर फैसला दिन्छन्। कार चालकको पहिचान नदिएकोमा उनलाई दोषी ठहर गरिएको हो। यो घटना सालाहले लिभरपुल छाड्ने घोषणा गरेको केही दिनपछि भएको थियो। उनले लिभरपुलमा ९ वर्ष बिताएपछि मार्च २४ मा क्लब छाड्ने घोषणा गरेका थिए। लिभरपुलका लागि सालाहले ४४२ खेलमा २५७ गोल गरेका थिए। २०२५–२६ सिजनपछि उनी टर्कीको ट्राब्जोनस्पोर क्लबमा आबद्ध भएका छन्।
