इरानका विदेशमन्त्री अब्बास अरागचीले एक साताभित्र होर्मुज जलमार्ग पुनः खोल्न सक्ने गरी आफ्नो देशले अमेरिकालाई एउटा सम्झौता प्रस्ताव गरेको बताएका छन्। “आवश्यक सर्तहरू पूरा भएमा” त्यो सम्भव रहेको उनले न्यूयोर्कस्थित संयुक्त राष्ट्रसंघमा पत्रकारहरूसँग बताए। उनका अनुसार गत जुन महिनामा हस्ताक्षर गरिएको समझदारीपत्रमै ती शर्तहरू समावेश छन्। “अब निर्णय गर्ने कुरा अमेरिकाको हातमा छ,” अरागचीले भने। उक्त योजना कतारबाट अमेरिकासम्म पुर्याइएको उनले बताए।
इरानको प्रस्तावबारे जिज्ञासा राख्दा एक अमेरिकी अधिकारीले मध्यस्थकर्ताहरूमार्फत सकारात्मक वार्ता जारी रहेको र परमाणु मुद्दाहरूमा पनि छलफल भइरहेको बताएका छन्। अमेरिकी राष्ट्रपति डोनाल्ड ट्रम्पले “इस्लामिक गणतन्त्र इरानलाई ध्वस्त पारिदिने” चेतावनी यसै साताको सुरुवातमा दिएका थिए।
अमेरिका र इजरायलले गत फेब्रुअरी २८ मा इरानमाथि हवाई आक्रमण शुरू गरे, जसको बदलामा इरानले इजरायल र खाडी देशहरुका अमेरिकी हवाई अड्डाहरुमा आक्रमण गरे साथै होर्मुज जलमार्ग बन्द गरिदियो। लडाइँ सुरु हुनु अघि विश्वको करिब २० प्रतिशत तेल र तरलीकृत प्राकृतिक ग्यास यही जलमार्गबाट ढुवानी हुन्थ्यो। तर होर्मुज जलमार्गमा अवरोधले ऊर्जा मूल्यमा व्यापक उतारचढाव ल्याएको छ।
“यदि आवश्यक सर्तहरू पूरा गरिएमा जलमार्ग पुनः खोल्न सकिन्छ र सात दिनभित्र सामान्य आवागमन पुनर्स्थापना गर्न सकिन्छ,” अरागचीले पत्रकारहरूसँग भने। इरानले अपेक्षा गरेको अमेरिकी कदमबारे उनले स्पष्ट भनेनन् तर बताए कि “अमेरिकाले चाल्नुपर्ने कदमहरू नयाँ नभई पुरानो समझदारीपत्रमा नै समावेश छन्।”
