ब्याङ्ककमा ४८ घण्टासम्म निरन्तर परेको भारी वर्षापछि सडकहरू जलमग्न भएपछि थाईल्यान्डको राजधानीमा आपतकाल घोषणा गरिएको छ। मानिसहरूलाई घरभित्रै बस्न आग्रह गरिएको छ भने शहरका नहरहरू नजिक बसोबास गर्नेहरूलाई आफ्ना सामानहरू घरको माथिल्लो तल्लामा सार्न भनिएको छ। यस वर्षको मौसममा थाईल्यान्डमा मेघ गर्जने घटना सामान्य भए पनि पछिल्ला तीव्र वर्षाले ब्याङ्ककको ढल निकास प्रणाली अस्तव्यस्त बनाएको छ। सामान्य अवस्थामा पनि ब्याङ्ककका साँघुरा सडकहरूमा सवारी जाम हुने गर्छ।
आइतबार पनि पानी पर्ने पूर्वानुमान छ, जसले थप नहरका बाँधहरू भत्कने जोखिम बढाएको छ। ५० जिल्लालाई संकटग्रस्त क्षेत्र घोषणा गरिएको छ। ब्याङ्ककका एक ६७ वर्षीया वृद्धाले भनिन्, “पानी निरन्तर परिरहेको छ। त्यसैले बाहिर निस्कन धेरै गाह्रो छ। मेरो कोठासम्म पानी पुगेको छ।” उहाँले शहरमा बाढीको स्तर सन् २०११ को भन्दा खराब भएको बताइन्, त्यो समयमा देशभरि हुने बाढीको प्रभाव ब्याङ्ककमा पनि देखिएको थियो।
तीन महिना लामो खराब मौसमले त्यतिबेला थाईल्यान्डमा सयौँ मानिसको मृत्यु भएको थियो। हालसम्म पछिल्लो बाढीबाट मानवीय क्षतिको जानकारी प्राप्त भएको छैन। थाईल्यान्डको मौसम विभागले अझै धेरै भारी वर्षाको चेतावनी जारी गरेको छ। यद्यपि पछिल्ला केही दिन यता निरन्तर वर्षा गरिरहेको न्यूनचापीय प्रणाली देशको मध्यभागतर्फ सरेको अनुमान गरिएको छ।
ब्याङ्ककका सबै ५० जिल्ला संकटग्रस्त क्षेत्र घोषणा गरिएका छन्। ब्याङ्ककका गभर्नर चाडचार्ट सीटीपानले शहरको पूर्वी भाग सबैभन्दा खराब प्रभावित भएको जानकारी दिनुभयो। उहाँले भन्नुभयो, “पानी परिरहेको छ र हामी सबै प्रयास गरिरहेका छौं। पानी निकाल्ने प्रयास गरिरहेका छौं, तर नहरहरू पूर्ण रूपमा पानीले भरिएका छन्। नहर नजीक बस्नेहरू जोखिममा छन्। सबै नहरहरू जलमग्न अवस्थामा छन्।”
