१८ चैत, काठमाडौं। एमाले संसदीय दलको बैठक आज बिहान ११ बजे पार्टी केन्द्रीय कार्यालय च्यासलमा बस्नेछ। बैठकमा संसदीय दलको नेता, प्रमुख सचेतक र सचेतक चयनसम्बन्धी छलफल गरिनेछ। प्रतिनिधि सभाको बैठक चैत १९ गते बोलाइएकोले त्यसअघि नै एमालेले दलको नेता, प्रमुख सचेतक र सचेतक चयन प्रक्रिया पूरा गर्ने तयारीमा छ। आजको बैठकमा संसदमा एमाले सांसदहरुको भूमिकाबारे समेत छलफल गरिने एक नेताले जानकारी दिएका छन्। जेनजी आन्दोलनमा दमन गरेको आरोपमा गत शनिबार पूर्वप्रधानमन्त्री तथा पार्टी अध्यक्ष केपी शर्मा ओली र तत्कालीन गृहमन्त्री तथा कांग्रेस नेता रमेश लेखक पक्राउ परेपछि सडक आन्दोलनमा उत्रिएको एमालेले सदनमा पनि विरोध गर्ने तयारी गरेको छ।
