फिल्म ‘एक मुठ्ठी बादल’ ले जेठ १ गते प्रदर्शन मिति तोक्दै आफ्नो पहिलो गीत ‘रेल घुम्यो घुम्ती’ सार्वजनिक गरेको छ। यस गीतमा आँचल शर्मा, निशा शर्मा, उषा रजक र सहयोग अधिकारीले स्वर दिएका छन्, र सुमित पाठकको संगीत रहेको छ। निर्देशक सहारा शर्माले गीतमा तीन पुस्ताका महिलाको भावना समेटिएको र चलचित्रको सार अभिव्यक्त भएको बताउनुभयो।
गीतको भिडियोमा विवाहअगाडिको रमाइलो वातावरण प्रस्तुत गरिएको छ। विवाह तयारीसँगै सुरु भएको गीतमा निशा शर्मा, उषा रजक र आँचल शर्माले आफ्ना जीवनका अनुभवहरुलाई गीतमा अभिव्यक्त गरेका छन्। सहारा शर्माले भनिन्, ‘हामीले गीत तयार गर्दा सबै पुस्ताका महिलाहरुको भावना समेट्न खोज्यौं। हाम्रा हजुरआमा देखि नातिनीसमेतले आत्मसात गर्न सक्ने सिर्जना बनाउन खोज्यौं र त्यो हाम्रो लक्ष्य पूरा भएको जस्तो लाग्छ।’
फिल्मको गीतलाई प्रतीक गुरुङले निर्देशन गरेका हुन्। गीतमा कृतिका बरालको कोरियोग्राफी, निहाल भण्डारीको छायांकन र कृष्ण भण्डारीको सम्पादन गरिएको छ। फिल्ममा आँचल शर्मा, निशा शर्मा, उषा रजक, भीमा मैनाली, अस्मिता गौतम, शेखर चापागाईँ, मनिष निरौला, सहयोग अधिकारी, गौरव विष्ट, अविरलप्रताप अधिकारी लगायतका कलाकारको अभिनय रहेको छ। फिल्मलाई अभिमन्यु दीक्षितले निर्माण गरेका हुन् भने निकुन श्रेष्ठ कार्यकारी निर्माता रहेका छन्।
फिल्मका प्रायः सबै विधामा महिलाहरुको नेतृत्व रहेको यस फिल्मलाई गौंथली इन्टरटेनमेन्ट र मन प्रोडक्सनले संयुक्त रूपमा निर्माण गरेका हुन्। फिल्मलाई नेपालमा आरआर फिल्म्सले वितरण गर्नेछ।
