समाचार सारांश: सनराइजर्स हैदराबादले आईपीएल क्रिकेटमा कोलकाता नाइट राइडर्सलाई पराजित गर्दै पहिलो जित हात पारेको छ। हैदराबादले २० ओभरमा ८ विकेट गुमाएर २२६ रन बनाएको थियो। कोलकाता १६ ओवरमा १६१ रनमा अलआउट भयो। १९ चैत, काठमाडौं। इन्डियन प्रिमियर लिग (आईपीएल) क्रिकेटमा सनराइजर्स हैदराबादले पहिलो जित हासिल गरेको छ। बिहीबार राति सम्पन्न खेलमा हैदराबादले कोलकाता नाइट राइडर्सलाई ६५ रनले पराजित गरेको हो। कोलकाताको भने यो लगातार दोस्रो हार हो। घरेलु मैदान इडेन गार्डेन्समा २२७ रनको विशाल लक्ष्य पछ्याएको कोलकाता १६ ओभरमा १६१ रनमा अलआउट भयो। ओपनर फिन इलेनले पहिलो ओभरमै डेभिड पेनलाई २ छक्का र ३ चौका प्रहार गरेपछि पहिलो ओभरबाटै २५ रन आएको थियो। त्यसपछि एक चौका प्रहार गरी एलन ७ बलमा २८ रन बनाएर आउट भए। कप्तान अजिन्क्या रहाने पनि ८ रनमै आउट भए। अंगकृश रघुवंशीले अर्धशतकसहित ५२ रन बनाए। २९ बल खेलेका उनले ६ चौका र २ छक्का प्रहार गरे। रिंकु सिंहले ३५ रन बनाए। हैदराबादका लागि जयदेव उनादकटले ३ ओभरमा २१ रन दिएर ३ विकेट लिए। इशान मलिंगा र नितिश कुमार रेड्डीले समान २-२ तथा हर्ष दुबेले १ विकेट लिए। त्यसअघि टस हारेर पहिले ब्याटिङ गरेको हैदराबादले २० ओवरमा ८ विकेट गुमाएर २२६ रन बनाएको थियो। हेनरिच क्लासेनले ३५ बलमा ५२ रन बनाए। अभிஷेक शर्माले २१ बलमा ४८, ट्राभिस हेडले २१ बलमा ४६ रन बनाए। नितिशले ३९ रन बनाए। कोलकाताका लागि ब्लेसिङ मुजाराबानीले ४ ओभरमा ४१ रन दिएर ४ विकेट लिए। वैभव अरोराले २ तथा कार्तिक त्यागी र अनुकुल रोयले १-१ विकेट लिए। प्रतियोगितामा पहिलो जित निकालेको हैदराबादले २ अंक जोडेर छैटौं स्थानमा उक्लिएको छ भने लगातार दुई हार बेहोरेको कोलकाता अंकविहीन रहँदै नवौं स्थानमा छ।
