समाचार सारांश रोयल च्यालेन्जर्स बेंगलुरुले आईपीएल २०२६ मा लगातार दोस्रो जीत हासिल गर्दै शीर्ष स्थानमा पुगेको छ। बेंगलुरुले चेन्नई सुपर किङ्सलाई ४३ रनले हराएको छ र चेन्नईले लगातार तेस्रो हार भोगेको छ। बेंगलुरुका भुवनेश्वर कुमारले ३ विकेट लिए भने अन्य बलरले पनि विकेट लिएर चेन्नईलाई २०७ रनमा अलआउट गराए। २२ चैत, काठमाडौं। रोयल च्यालेन्जर्स बेंगलुरुले इन्डियन प्रिमियर लिग (आईपीएल) २०२६ मा लगातार दोस्रो जीत हात पारेपछि शीर्ष स्थानमा उक्लिएको छ। आइतबारको खेलमा बेंगलुरुले चेन्नई सुपर किङ्सलाई ४३ रनले हराएको हो। बेंगलुरुले दिएको २५१ रनको चुनौती चेन्नईले पूरा गर्न नसक्दा १९.४ ओभरमा २०७ रनमा अलआउट भयो। यो चेन्नईको लगातार तेस्रो हार हो र उनीहरू अहिलेसम्म अंक शुन्य सहित तालिकाको तल्लो भागमा रहेको देखिन्छ।
चेन्नईले पुनः खराब शुरुवात गर्यो। कप्तान रुतुराज गायक्वाड ७ रनमा, सन्जु सामसन ९ रनमा र आयुष म्हात्रे १ रनमै आउट भएर टिम तेस्रो ओभरमा ३०-३ मा पुगेको थियो। सर्वश्रेष्ठ प्रदर्शन सरफराज खानको रह्यो जसले २५ बलमा ८ चौका र २ छक्का सहित ५० रन बनाए। प्रशान्त वीरले ४३ रन र जेमी ओभरटनले ३७ रन योगदान दिए। शिवम दुबे १८ रनमा आउट भए। बेंगलुरुको भुवनेश्वर कुमारले ३ विकेट लिए भने क्रुनाल पान्ड्या, अभिनन्दन सिंह र ज्याकब डफीले समान रूपमा २-२ विकेट लिए। सुयाश शर्मा १ विकेट लिए।
पहिले टस हारेर ब्याटिङ गर्ने मौका पाएको बेंगलुरुले देवदत्त पडिक्कलको अर्धशतक र टिम डेभिडको आक्रामक खेलबाट २० ओभरमा ३ विकेट गुमाउँदै २५० रन बनायो। डेभिडले २१ बलमा अर्धशतक प्रहार गर्दै २५ बलमा ३ चौका र ८ छक्का सहित अविजित ७० रन बनाए। पडिक्कलले ५१ रन जोडे र कप्तान रजत पाटिदारले ४८ रन अविजित खेले। ओपनर फिल साल्टले ४६ रन र विराट कोहलीले ३८ रन थपे। टिम डेभिड १८औं ओभरमा २८ रन बनाएर खेलिरहेका बेला अन्शुल कम्बोजको बलमा बोल्ड भए तर त्यो बल नो बल प्रमाणित भएपछि चेन्नईलाई महँगो पर्यो। चेन्नईका लागि अन्शुल कम्बोज, जेमी ओवरटन र शिवम दुबेल सँगै १-१ विकेट लिए।
