नेपाल राष्ट्रिय फुटबल टोलीका पूर्व कप्तान विराज महर्जन र गोलरक्षक विकेश कुथुद्वारा सञ्चालित ट्वेल्व फुटबल ट्रेनिङ सेन्टरले समर फुटबल क्याम्प २०२६ सुरु गरेको छ। सातदोबाटोस्थित नेपाल स्पोर्ट्स फेलोसिप मैदानमा वैशाख ५ गतेसम्म चल्ने क्याम्पमा ४ देखि १६ वर्षका ६१ विद्यार्थी सहभागी छन्। क्याम्पले विद्यार्थीलाई ग्याजेटबाट टाढा राख्दै फुटबलमा आकर्षित गर्ने र दुई प्रशिक्षार्थीलाई छात्रवृत्ति दिने योजना बनाएको छ।
क्याम्पको पहिलो दिन ६१ विद्यार्थी सामेल थिए। विद्यार्थीहरू छुट्टीको समयमा लामो समय फोन, ल्यापटप, टिभी जस्ता इलेक्ट्रोनिक उपकरण हेर्दै बिताउने गरेका छन्, जसले दीर्घकालीन रूपमा शारीरिक तथा मानसिक स्वास्थ्यमा नकारात्मक प्रभाव पार्न सक्छ। यसलाई मध्यनजर गर्दै विद्यार्थीहरूलाई ग्याजेटबाट केहि समयका लागि टाढा राख्ने उद्देश्यका साथ यो क्याम्प आयोजना गरिएको हो।
क्याम्पको मुख्य लक्ष्य विद्यार्थीहरूको मानसिक र शारीरिक स्वास्थ्य सुधार गर्नुका साथै नेपालको लोकप्रिय खेल फुटबलप्रति सानै उमेरदेखि आकर्षित पार्नु पनि हो। ४ देखि १६ वर्षसम्मका बालबालिका सहभागी रहेको यस क्याम्पमा उमेर अनुसार समूह विभाजन गरी प्रशिक्षण दिइएको छ। प्रशिक्षकको रूपमा विराज महर्जनसँगै अन्य एएफसीबाट प्रमाणित उत्कृष्ट प्रशिक्षकहरू सहभागी छन्।
विकेश कुथु आज क्याम्पमा उपस्थित थिएनन् किनभने उनी त्रिभुवन आर्मी फुटबल क्लबको विराट गोल्डकप खेल्न झापा ११ विरुद्धको खेलमा सामेल छन्। बालबालिकाहरूको समग्र विकास लक्षित गरी तयार पारिएको डेभलपमेन्ट प्लानअनुसार क्याम्पको अवधि भरि प्रशिक्षण प्रदान गरिनेछ। नेपाल फुटबल खेलाडी संघका अध्यक्ष तथा पूर्व राष्ट्रिय खेलाडी विक्रम लामा र एजिसका प्रबन्ध निर्देशक सुरज मगरले टीएफटीसी समर फुटबल क्याम्प २०२६ को औपचारिक उद्घाटन गरेका थिए।
