महालक्ष्मी विकास बैंकले नयाँ वर्ष २०७८ लाई डिजिटल प्रवर्द्धन वर्षको रूपमा मनाउँदै मोबाइल बैंकिङ प्रयोगकर्ताका लागि गोलाप्रथाको आयोजना गरेको छ। बैंकले मोबाइल बैंकिङ प्रयोगकर्ताले पाउने रिवार्ड पोइन्टलाई प्रवर्द्धन गर्दै प्ले स्टोर र एप्स स्टोरबाट डाउनलोड गर्न सकिने एपमार्फत पोइन्ट प्रयोग गर्न सकिने व्यवस्था गरेको छ। ३० चैत, काठमाडौं।
ग्राहकलाई आधुनिक, सुरक्षित तथा सहज बैंकिङ सेवा प्रदान गर्दै आएको महालक्ष्मी विकास बैंकले नयाँ वर्ष २०७८ लाई लक्षित गर्दै विभिन्न योजना सार्वजनिक गरेको छ। वर्ष २०७८ लाई डिजिटल प्रवर्द्धन वर्षको रूपमा मनाउने बैंकको योजना अनुसार मोबाइल एप ‘महालक्ष्मी स्मार्ट साथी’ मार्फत बैंकका सबै सक्रिय मोबाइल बैंकिङ प्रयोगकर्ताले आफ्नो मोबाइल बैंकिङ प्लेटफर्ममार्फत वैशाख महिनाको पहिलो साता कम्तीमा एक सफल कारोबार गर्नु पर्नेछ। यस अवस्थामा गोलाप्रथा मार्फत ३ जना प्रयोगकर्ताले आकर्षक भ्रमण प्याकेज जित्न सक्नेछन्।
जीत्ने ३ जना प्रयोगकर्ताले आन्तरिक पर्यटन अन्तर्गत पोखरा, चितवन र मनकामना जोडीसहित भ्रमण गर्ने अवसर पाउनेछन्। साथै, डिजिटल बैंकिङलाई प्रोत्साहन गर्न मोबाइल बैंकिङ प्रयोगकर्ताले विभिन्न डिजिटल कारोबार गरे बापत पाउने रिवार्ड पोइन्टलाई अझ प्रवर्द्धन गरिनेछ। मोबाइल बैंकिङ प्रयोगकर्ताले प्राप्त गर्ने फोन पोइन्ट रिवार्ड एपमा जम्मा हुनेछ जुन प्ले स्टोर तथा एप्स स्टोरबाट डाउनलोड गर्न सकिनेछ।
नयाँ वर्ष २०७८ को अवसरमा बैंकले सुलभ ब्याजदरमा घरकर्जा सेवा समेत सञ्चालनमा ल्याएको छ। महालक्ष्मी घरकर्जा अन्तर्गत आवासीय/व्यावसायिक घर तथा जग्गा खरीद, घर निर्माण, अपार्टमेन्ट खरीद, घर थप/पुनर्निर्माण/मर्मत सम्भारका लागि न्यूनतम २ वर्षदेखि अधिकतम ३० वर्षसम्मको अवधिमामा कर्जा प्रदान गरिनेछ। यस्तो कर्जाको ब्याजदर ७ वर्ष अवधिको लागि स्थिर रहने बैंकले जनाएको छ।
सम्बन्धित खबर
