५ वैशाख, काठमाडौं। भारतीय राष्ट्रिय कांग्रेसकी सांसद तथा नेतृ प्रियंका गान्धीले लोकसभामा संविधान संशोधन विधेयक असफल हुनु लोकतन्त्रको ठूलो विजय भएको बताएकी छन्। उनले यसलाई सरकारी षड्यन्त्रको पराजय पनि भनेकी छन्। शनिबार आयोजित पत्रकार सम्मेलनमा उनले मोदी सरकारले लोकतन्त्रलाई कमजोर बनाउने र देशको संघीय संरचनामा परिवर्तन ल्याउने प्रयासलाई विपक्षी एकताले पराजित गरेको दाबी गरिन्।
गान्धीका अनुसार यो हार सत्ता पक्षका नेताहरूको अनुहारमा स्पष्ट देखिएको छ र यसले संविधान तथा देशको विजय सुनिश्चित गरेको छ। उनले सरकारको नियतमा प्रश्न उठाउँदै भनिन्, ‘यो केवल महिला आरक्षणको विषय मात्र थिएन, बरु यसलाई परिसीमनसँग जोडिएको थियो जहाँ सरकारले जातिगत जनगणनाको तथ्याङ्क नहेरी आफ्नो मनमानी गर्न पाओस्।‘ विपक्षी दलहरूले एकजुट हुँदा सरकारको मनमानी कसरी रोक्न सकिन्छ भन्ने उदाहरण यो घटनाले पुष्टि गरेको उनको तर्क थियो।
सरकारले यस दिनलाई ‘ब्ल्याक डे’ भनेको सन्दर्भमा टिप्पणी गर्दै प्रियंकाले भनिन्, ‘मोदी सरकारले पहिलो पटक ठूलो झटका पाएको छ, त्यसैले उनीहरूले यसलाई कालो दिन ठानेका छन्। तर लोकतन्त्र बचाउन यो झटका आवश्यक थियो।‘ उनले सरकारको प्रचार र मिडियाकर्मीहरूलाई अब देशका महिलाहरूले बुझिसकेको र यस्तो नाटक धेरै दिन टिक्दैन भन्ने चेतावनी दिइन्। शुक्रबार लोकसभामा पेश गरिएको १३१औं संविधान संशोधन विधेयक मतदानमा आवश्यक बहुमत प्राप्त गर्न नसकेर असफल भएको थियो, जसलाई विपक्षीले आफ्नो रणनीतिक सफलताको रूपमा लिएका छन्।
