६ वैशाख, काठमाडौं। राष्ट्रियसभा अध्यक्ष नारायणप्रसाद दाहाल र अष्ट्रेलियालाइ प्रतिनिधि सभा सभामुख मिल्टन डिकबीच शिष्टाचार भेटवार्ता भएको छ। टर्कीको इस्तानबुलमा जारी अन्तर व्यवस्थापिका संघको १५२औँ महासभामा सहभागी हुन पुगेका दुवै नेताबीच उक्त भेटवार्ता भएको हो। भेटमा, अध्यक्ष दाहालको सचिवालयले जनाएअनुसार, नेपाल र अष्ट्रेलियाबीचको द्विपक्षीय सम्बन्ध, आपसी हित तथा संसदीय सहकार्यका विषयमा विस्तृत छलफल गरिएको थियो।
अष्ट्रेलियाले नेपालका विकास र समृद्धिका लागि विगतदेखि निरन्तर सहयोग गर्दै आएको उल्लेख गर्दै अध्यक्ष दाहालले आगामी दिनमा थप सहयोग र सहकार्यको अपेक्षा व्यक्त गरे। यस क्रममा, अष्ट्रेलियाका सभामुख मिल्टनले अष्ट्रेलिया र नेपालको सम्बन्ध विगतदेखि अत्यन्तै सौहार्दपूर्ण रहेको र संसदीय सहकार्यले दुई देशबीचको सम्बन्धलाई अझ प्रगाढ र मजबुत बनाउने विश्वास व्यक्त गरे। उक्त भेटमा नेपाली संसदीय प्रतिनिधिमण्डलबाट राष्ट्रियसभाका सदस्यहरू कृष्णबहादुर रोकाया, डा. अञ्जान शाक्य र राष्ट्रियसभा सचिव तुलबहादुर कँडेल लगायत सहभागी थिए।
