६ वैशाख, काठमाडौं । सरकारले राष्ट्रसेवक कर्मचारीहरूलाई १५/१५ दिनमा तलब भत्ता उपलब्ध गराउने योजना बनाएको छ। अर्थ मन्त्रालयले गत शुक्रबार मन्त्रीस्तरीय निर्णय गर्दै महालेखा नियन्त्रक कार्यालयलाई आवश्यक व्यवस्था मिलाउन निर्देशन दिएको छ। महालेखा नियन्त्रक शोभाकान्त पौडेलले मन्त्रालयबाट प्राप्त परिपत्रको जानकारी दिँदै अब उक्त निर्णय चाँडै कार्यान्वयनमा आउने बताए। ‘अर्थ मन्त्रालयबाट परिपत्र आइसकेको छ। यो छिट्टै कार्यान्वयन हुनेछ,’ उनले भने।
मन्त्रालयका अनुसार, समयमा कर्मचारीको खातामा रकम पुगे र अर्थतन्त्र सुचारु रहोस् भन्ने उद्देश्यले यस्तो निर्णय गरिएको हो। निर्णय कार्यान्वयनका लागि ऐनमा संशोधन आवश्यक छ। हाल सरकारी कर्मचारीहरूले मासिक आधारमा तलब भत्ता पाउँदै आएका छन्। हरेक महिनाको अन्तिम सातामा सम्बन्धित कर्मचारीको बैंक खातामा तलब भत्ता पठाउने व्यवस्था छ। तर अब १५ दिनमै तलब भुक्तानी दिने निर्णय कार्यान्वयन गर्न संघीय निजामती सेवा ऐनमा संशोधन गर्नुपर्ने हुन्छ। ‘पुरानो ऐनअनुसार निजामती कर्मचारीले प्रत्येक महिना भुक्तानीपछि मात्र तलब र भत्ता पाउने व्यवस्था छ,’ अर्थ मन्त्रालयका एक अधिकारीले भने, ‘अतः १५ दिनमा तलब/भत्ता दिने व्यवस्था अघि सार्न ऐनमा संशोधन गर्नुपर्ने हुन्छ।’ वर्तमान सरकारले संघीय निजामती सेवा ऐन जारी गर्ने तयारी गरिरहेको छ जसमा १५ दिनमा तलब भुक्तानी व्यवस्था राख्ने योजना छ। ‘संघीय निजामती सेवा ऐन पास भएपछि जब चाहिँ निर्णय कार्यान्वयन गर्न सकिन्छ। त्यसका लागि आवश्यक तयारी भइरहेको छ,’ अर्थ मन्त्रालयका स्रोतले बताए।
