प्रतिनिधिसभा नियमावली अनुसार प्रत्येक बैठकको पहिलो एकघण्टामा प्रश्नोत्तर कार्यक्रम सञ्चालन गरिनेछ। प्रश्न सोध्न चाहने सदस्यले प्रश्न, सम्बन्धित मन्त्री र नियम ४७ को हकमा सदस्यको नाम उल्लेख गरी सूचना दिनुपर्नेछ। मौखिक उत्तरका लागि दैनिक २० र लिखित उत्तरका लागि ५० भन्दा बढी प्रश्न सूचीमा राखिने छैन र प्रश्नहरूको क्रम दर्ताक्रम अनुसार निर्धारण गरिनेछ। ८ वैशाख, काठमाडौं।
संसदको प्रत्येक बैठकमा प्रश्नोत्तर कार्यक्रम सञ्चालन गरिने निर्णय गरिएको छ। प्रतिनिधिसभा नियमावलीको नियम ४१ मा प्रश्नोत्तर समयसम्बन्धी व्यवस्था उल्लेख छ। उपनियम १ अनुसार, ‘सभामुखले अन्यथा आदेश नदिएसम्म प्रत्येक दिनको पहिलो बैठकको एकघण्टा प्रश्नोत्तरको लागि छुट्याइनेछ।’ प्रश्नोत्तर समय समाप्त भएपछि बैठकको कार्यसूचीअनुसार अन्य अनुष्ठानहरू सुरु गरिनेछन्। नेपाल सरकारको कार्यक्षेत्र र उत्तरदायित्वभित्र पर्ने सार्वजनिक महत्त्वका विषयहरूमा बैठकमा प्रश्न सोध्न सकिनेछ।
सभाको अधिवेशन सुरु भएसँगै प्रश्न दर्ता गर्न सकिनेछ। प्रश्न सोध्न चाहने सदस्यले खुलाउनुपर्ने विषयहरू पनि नियमावलीमा व्यवस्था गरिएको छ। (क) सोध्न खोजिएको प्रश्न, (ख) प्रश्नसँग सम्बन्धित मन्त्री, र (ग) नियम ४७ को हकमा सम्बन्धित सदस्यको नाम उल्लेख गर्नुपर्नेछ। प्रश्न सूचना एकभन्दा बढी सदस्यले हस्ताक्षर गरेमा पहिलो हस्ताक्षरकर्ता अनुसार सूचना मानिनेछ। यदि पहिलो हस्ताक्षरकर्ता अनुपस्थित भएमा क्रममै रहेका अन्य सदस्यलाई कायम गरिनेछ।
प्रतिनिधिसभा नियमावलीअनुसार एउटै विषयमा एकभन्दा बढी सदस्यले प्रश्न सूचना दिएमा पहिलो दर्ता गरिएको प्रश्नलाई मात्र मान्यता दिइनेछ। तर सभामुखले सोध्ने सबै सदस्यहरूको नाम बैठकमा पढेर सुनाउनेछन्। प्रश्नहरू मौखिक र लिखित गरी दुई प्रकारका हुनेछ। अभिलेख, तथ्यांक लगायत समावेश गरी दिनुपर्ने उत्तरहरू लिखित रूपमा उपलब्ध गराइनेछन्। मन्त्रालयबाट जवाफ प्राप्त भएपछि प्रत्येक दिन मौखिक र लिखित उत्तरका लागि छुट्टाछुट्टै प्रश्न सूची तयार गरिनेछ र त्यसमाथि अस्वीकार नगरिएका सबै प्रश्नहरू समावेश गरिनेछन्। तर दैनिक २० वटा मौखिक उत्तर र ५० भन्दा बढी लिखित उत्तरका प्रश्न सूचीमा राखिने छैन। सो सूचीमा एउटै सदस्यका दुईभन्दा बढी मौखिक उत्तरका प्रश्नहरू समावेश गरिने छैन। लिखित उत्तर दिने प्रश्नहरू क्रम प्राप्त समय तथा विषयअनुसार निर्धारण गरिनेछ भने मौखिक उत्तर दिने प्रश्नहरूको क्रम दर्ताक्रम अनुसार निर्धारण गरिनेछ।
