कवियत्री अनुशा शर्मा सुवेदीद्वारा लिखित कविताकृति ‘पोइटिक डायस्पोरा’ माथि ललितपुर हात्तिवनमा समीक्षा गरिएको छ। प्राध्यापक अरुण गुप्तोले कविताका शब्दहरू चिन्तनशील र लेखकको शब्द खेलाउने क्षमता सशक्त रहेको बताएका छन्। अनुशाले परिवारदेखि टाढा हुँदा अनुभव भएका भाव कवितामा समेटेकी छिन् र शिव भगवानप्रति गहिरो भक्तिभाव रहेको समेत बताएकी छिन्।
काठमाडौँ। कवियत्री अनुशा शर्मा सुवेदीद्वारा लिखित कविताकृति ‘पोइटिक डायस्पोरा’ माथि परिचर्चा गरिएको छ। ललितपुरको हात्तिवनमा आयोजित विशेष समारोहमा उक्त कृतिमाथि समीक्षा गरिएको हो। प्रमुख अतिथिसमेत रहेका प्राध्यापक अरुण गुप्तोले कविताका शब्दहरू निकै विचारशील रहेको बताएका छन्। अंग्रेजी भाषामा लेखिएका १३० वटा कविता निकै शक्तिशाली रहेको उनले बताए। उनले लेखिकाको कुनै विषयलाई समातेर शब्दसँग रमाउने क्षमता र शब्दकल्पनाशक्ति निकै बलियो रहेको उल्लेख गरे।
यस्तै कवि समीक्षक केशव सिग्देलले अनुशाका कविताहरुलाई उच्च स्तरको भने। ‘शब्द-शब्दमा गहिरा अर्थहरू मिठो कलाकृतिमा बाँधिएका छन्। जटिल शैलीले पाठकलाई बाँधेर राख्न सक्दैन। कवितामा भक्तिभाव प्रबल छ। कविताहरू पढ्दा कविका मनोस्वतन्त्रताको चिन्तन स्पष्ट झल्किन्छ,’ उनले भने। समीक्षक महेश पौडेलले अनुशाका कविताहरूमा जीवन र संसारलाई हेरिने दृष्टी रहेको बताए। उनले मेडिटेसन गर्न सक्ने सामर्थ्य कवितामा रहेको धारणा राखे।
कवि सरला केसीले पनि अनुशाका कवितामा गहिरो भाव रहेको उल्लेख गरेकी थिइन्। ‘मलाई उहाँका कविता पढ्दा कुनै शीतल छहरामै बसेजस्तो अनुभूति हुन्छ। शब्दमा शक्ति र भावमा प्रभाव छ। भावनात्मक सन्देशमा पाठकलाई बाँध्न सक्ने क्षमता कवितामा छ,’ उनले भनिन्। कवि लेखक राजीव श्रेष्ठले अनुशाका कवितामा जीवनको अनुभूति पाएको प्रतिक्रिया दिए। ‘उहाँका कविता आफ्नै जीवन अनुभवबाट निस्केका प्रतिबिम्ब जस्ता छन्। म उहाँसँग नजिकबाट काम गर्दै आएको कारण उहाँलाई चिन्दछु। उहाँ आध्यात्मिक व्यक्ति हो। शिव भक्तिमा उहाँले चरम आनन्द प्राप्त गर्नुहुन्छ। त्यसैले उहाँका कवितामा आध्यात्मिक रस पनि पाइन्छ,’ उनले भने।
आफूलाई बुझ्न सके महिलाले समाजमा कसरी सशक्त भूमिका निर्वाह गर्न सक्ने भन्ने सन्देश अनुशाका कवितामा रहेको प्राध्यापक गुप्तोले बताए। उनले कविता पढ्दा अध्यात्मिक भावसँगै राष्ट्रिय चेतनाको झल्को पनि भेटिएको बताए। पत्रकार कवि तथा लेखक दीपक सापकोटाले अनुशाका केही कविता बाचन गरेका थिए। पत्रकार एवं साहित्यकार राज सरगमले सहजकर्ताको भूमिकामा रहेर अनुशासँग कृतिका बारे संवाद गरेका थिए।
त्यसक्रममा अनुशाले आफूले शब्दमा व्यक्त गर्न नसकेको कुरा कविताबाट अभिव्यक्त गरेको बताइन्। ‘मैले विविध कारणले परिवारबाट टाढा रहँदा अनुभूत भावहरू कविता मार्फत व्यक्त गरेकी छु। आफ्ना भनाइहरू कवितामार्फत् प्रस्तुत गरेको छु। यो कृति प्रकाशनमा मेरो परिवारले ठूलो साथ दिएको छ,’ उनले भनिन्। उनले आफूमा प्रकृति प्रेम र शिव भगवानप्रति उच्च भक्तिभाव रहेको जानकारी गराइन्। कार्यक्रममा लेखक तथा बालगीतकार रामबाबु सुवेदीले स्वागत मन्तव्य व्यक्त गरेका थिए।
सम्बन्धित खबर
