मुगुम कार्मारोङ गाउँपालिकाले ३ जेठमा छायाँनाथ केन्द्रित ३० किलोमिटर लामो प्रथम छायाँनाथ अल्ट्रा रेस आयोजना गर्ने जानकारी दिएको छ। प्रतियोगितामा महिला र पुरुष दुवै विधामा दौड आयोजना गरिनेछ भने स्थानीय सहभागिता प्रोत्साहन गर्न ५ किलोमिटर फन रन पनि राखिएको छ। विजेतालाई २ लाखदेखि ५० हजार रुपैयाँसम्म नगद पुरस्कार र मेडल प्रदान गरिनेछ। प्रतियोगिताको कुल खर्च ९८ लाख रुपैयाँ अनुमान गरिएको छ।
१० वैशाख, काठमाडौं। मुगुको मुगुम कार्मारोङ गाउँपालिकाले ‘प्रथम छायाँनाथ अल्ट्रा रेस’ आयोजना गर्न लागेको छ। गाउँपालिकाले पत्रकार सम्मेलनमार्फत आगामी जेठ ३ गते पुलुमा प्रतियोगिता सञ्चालन हुने जानकारी दिएको हो। छायाँनाथ धाम (एब्लाङ) केन्द्रित यो क्षेत्र प्राकृतिक सौन्दर्य, हिमाली भू-परिवेश र धार्मिक आस्थाको संगमको रूपमा परिचित छ। तर पर्याप्त पूर्वाधार र प्रचारप्रसारको अभावले यसको सम्भावना पूर्ण रूपमा उजागर हुन नसकेको गाउँपालिकाले जनाएको छ।
यस क्षेत्रको सम्भावनालाई प्रवर्द्धन गर्दै साहसिक खेलमार्फत खेल पर्यटन विकास गर्ने उद्देश्यले अल्ट्रा रेस आयोजना गरी रहेको छ। मुगुम कार्मारोङ गाउँपालिका र अल नेपाल स्पोर्ट्स फाउन्डेसनको सहकार्यमा आयोजना हुने प्रतियोगितालाई नेपाल एड्भेन्चर रनिङ महासंघले प्राविधिक सहयोग गर्नेछ। किम्रि (२८८० मिटर) बाट सुरु हुने ३० किलोमिटर लामो दौड छायाँनाथ (४८२० मिटर) र चिताइकुना (२४४० मिटर) हुँदै पुलु (२२५५ मिटर) मा पुगेर समापन हुनेछ। प्रतियोगितामा महिला र पुरुष दुवै विधामा प्रतिस्पर्धा हुनेछ।
