पाकिस्तान क्रिकेट बोर्ड (पीसीबी) ले लागुपदार्थ प्रयोग गरेको आरोप लागेको खेलाडीलाई कारबाही गर्न प्रक्रियाको सुरुवात गरेको जनाएको छ। पीसीबीले अन्तर्राष्ट्रिय क्रिकेट परिषद् (आईसीसी) को प्रतिवेदनका आधारमा आफ्नो राष्ट्रिय टोलीका खेलाडी मोहम्मद नवाजलाई कारबाही गर्न लागेको हो। उक्त प्रतिवेदन टी२० विश्वकपका क्रममा ‘रिक्रिएशनल ड्रग’ अर्थात् मनोरञ्जनका लागि प्रयोग गरिने लागुपदार्थ प्रयोगसँग सम्बन्धित छ। पीसीबीका प्रवक्ता आमिर मीरले बीबीसी उर्दूलाई बताएअनुसार बोर्डले नवाजलाई उक्त विषयमा बिहीवारभित्र स्पष्टीकरण बुझाउन भनिएको छ। मीरका अनुसार आईसीसीले पठाएको प्रतिवेदनमा नवाजले लागुपदार्थ प्रयोग गरेको पोजिटिभ नतिजा आएकोले थप कारबाही गर्न लागिएको छ। मीरका अनुसार यस्तो मामिलामा पहिला आईसीसीले जाँच गरी आफ्नो निष्कर्ष निकाल्छ र त्यसपछि आरोप लागेका खेलाडीलाई जवाफ दिने मौका प्रदान गरिन्छ। लागुपदार्थ प्रयोग सम्बन्धी सबै कारबाही आईसीसीको क्षेत्राधिकारमा पर्ने उनले बताए।
यसअघि क्रिकेट वेबसाइट क्रिकइन्फोले मोहम्मद नवाजले गत फेब्रुअरी र मार्चमा भारत तथा श्रीलङ्कामा भएको टी२० विश्वकपका बेला ‘रिक्रिएशनल ड्रग’ प्रयोग गरेको शंका गरिएको र जाँचको रिपोर्ट पोजिटिभ आएको विवरण सार्वजनिक गरेको थियो। टी२० विश्वकपका लागि पाकिस्तानी टोलीमा रहेका मोहम्मद नवाज कुल सात खेलमा सहभागी भए। पाकिस्तान सेमिफाइनलसम्म पुग्न सकेन र नवाजको प्रदर्शन पनि खासै प्रभावशाली थिएन। नवाज हाल पाकिस्तान सुपर लिग (पीएसएल) मा मुल्तान सुल्तान्सबाट खेल्दैछन्। उनीमाथि के कस्तो कारबाही हुन्छ र खेल्न पाउँछन् कि पाउँदैनन् भन्ने कुरा स्पष्ट हुन बाँकी रहेको छ। यस विषयमा बीबीसीले आईसीसीलाई सम्पर्क गरेको छ, तर अहिलेसम्म कुनै प्रतिक्रिया प्राप्त भएको छैन।
