११ वैशाख, काठमाडौं । इरानका विदेशमन्त्री अब्बास अराघची आज राति पाकिस्तानको राजधानी इस्लामावादमा पुग्न लागेका छन्। इरानी सरकारी समाचार एजेन्सी आईआरएनएका अनुसार, उनी आज इस्लामावाद, ओमानको राजधानी मस्कट र रसियाको राजधानी मास्कोका लागि इरानबाट यात्रा सुरु गर्ने योजना बनाएका छन्। यसअघि पाकिस्तानको सरकारी स्रोतलाई उद्धृत गर्दै आज राति अराघची इस्लामावाद पुग्ने जानकारी दिइएको थियो।
उनको इस्लामावाद भ्रमणको उद्देश्य द्विपक्षीय संवाद र अमेरिका तथा इजरायलसँग कायम युद्धविरामको अवस्थाबारे छलफल गर्नु रहेको जनाइएको छ। इस्लामावादमै अमेरिकाको एक सुरक्षा टोली पनि शान्तिवार्ताको अर्को चरणका लागि बसिरहेको बताइएको छ। पाकिस्तानले दुवै पक्षसँग निरन्तर संवाद गरिरहेको छ। अमेरिका र इरानबीचको पहिलो चरणको शान्तिवार्ता असफल भएपछिको अर्को चरणका लागि पाकिस्तान फेरि वार्ता गराउने प्रयास गरिरहेको छ।
